కేంద్రం తీసుకొచ్చిన వ్యవసాయ చట్టాలకు వ్యతిరేకంగా ఆందోళనలు చేస్తున్న రైతులకు అండగా నిలిచిందేందుకు కాంగ్రెస్ పార్టీ సామాజిక మాధ్యమాల్లో ప్రత్యేక కార్యక్రమం చేపట్టింది. 'హ్యాష్‌ ట్యాగ్ స్పీక్‌ అప్‌ ఫర్ ఫార్మర్స్‌' పేరిట ప్రచారం ప్రారంభించారు కాంగ్రెస్ అగ్రనేత రాహుల్ గాంధీ. ఈ మేరకు ఒక నిమిషం నిడివిగల వీడియోను ట్విట్టర్లో పోస్ట్ చేశారు.
"రైతుల హితం కోసమే వ్యవసాయ చట్టాలను తీసుకువచ్చామని మోదీ చెబుతున్నారు. ఈ చట్టాలు రైతుల మంచికోసమే అయితే అన్నదాతలు ఎందుకు సంతోషంగా లేరు? ఎందుకు ఆందోళనలు చేస్తున్నారు? మోదీ.. ఇద్దరు, ముగ్గురు మిత్రులకు ఉపయోగపడేందుకే ఈ చట్టాలు తెచ్చారు. అందుకే దేశానికి శక్తినిచ్చే అన్నదాతకు మద్దతుగా మనందరం నిలబడాల్సిన అవసరముంది."
-- ట్విట్టర్లో రాహుల్ గాంధీ
"తొలుత రైతు వ్యతిరేక వ్యవసాయ చట్టాలు తెచ్చిన మోదీ ప్రభుత్వం.. తాజాగా అన్నదాతలపై లాఠీలు ఝుళిపిస్తోంది" అని రాహుల్ గాంధీ విమర్శించారు. అన్నదాతలు గళమెత్తితే యావత్ దేశం ప్రతిధ్వనిస్తుందనే సంగతిని మోదీ సర్కార్ మరిచిపోయిందని అన్నారు. ఇళ్లను, పొలాలను వదిలి ఎముకలు కొరికే చలిలో దిల్లీలో రైతులు వ్యవసాయ చట్టాలకు వ్యతిరేకంగా తమ గళాన్ని వినిపిస్తున్నారన్నారు. సత్యాసత్యాల మధ్య జరుగుతున్న ఈ పోరాటంలో ప్రధాని అన్నదాతల వైపున ఉంటారో లేదా పెట్టుబడిదారీ స్నేహితుల వైపు ఉంటారో తేల్చుకోవాలని ట్విట్టర్ వేదికగా సూచించారు రాహుల్.
ఇదీ చదవండి: ఐదో రోజుకు అన్నదాతల ఆందోళన
ఇదీ చదవండి: వ్యవసాయ చట్టాలపై అన్నదాతల ధర్మాగ్రహం
ఇదీ చదవండి: నూతన సాగు చట్టాలతో రైతులకు మేలే: మోదీ
