భాజపాపై విశ్వాసంతోనే కేంద్రంలో, హరియాణాలో ప్రజలు అధికారమిచ్చారని ప్రధాన మంత్రి నరేంద్ర మోదీ అన్నారు. అసెంబ్లీ ఎన్నికలు జరగకముందే కాంగ్రెస్ ఓటమి అంగీకరించిందని ఎద్దేవా చేశారు.
హరియాణా హిసార్లో ఎన్నికల ప్రచారం నిర్వహించారు మోదీ. కాంగ్రెస్ పాలన అవినీతిమయమని ఆరోపించారు.
"ప్రస్తుతం కాంగ్రెస్ దుస్థితి ఎలా ఉందో వాళ్ల మాటలను బట్టి అర్థమవుతోంది. వారి పరిస్థితి ఎలా ఉందో ఓ వీడియో ద్వారా తెలుస్తోంది. పార్లమెంట్ ప్రాంగణంలో కాంగ్రెస్ నేతలు హరియాణాకు చెందిన నాయకులను చిన్నచూపుతో చూస్తున్నారు. హరియాణా నేతలు మాత్రం చేతులు జోడించి వారికి నమస్కరిస్తున్నారు. ఆ వీడియో మీరు చూశారా? హరియాణాకు అవమానం జరగడం మీకు సబబేనా. అలాంటి కాంగ్రెస్ నేతలతో హరియాణా గౌరవం పెరుగుతుందా. వాళ్లు ఏం మాట్లాడారో స్పష్టంగా తెలుస్తోంది. 10-15సీట్లు గెలిస్తే చాలనుకుంటున్నారు. వాళ్లు ఇప్పటికే ఓటమిని అంగీకరించారు. పోటీ నుంచి తప్పుకున్నారు."
-నరేంద్ర మోదీ, ప్రధాన మంత్రి
దుష్యంత్ చౌతాలా సారథ్యంలోని జన్నాయక్ జనతా పార్టీ(జేజేపీ)పైనా విమర్శలు గుప్పించారు మోదీ. ఆ పార్టీ విధివిధానాలను హరియాణా ప్రజలు తిరస్కరించినట్లు చెప్పారు.
దుష్కృత్యాలు చేసిన ప్రభుత్వం కావాలో, సుపరిపాలన అందించే ప్రభుత్వం కావాలో తేల్చుకోవాలని హరియాణా ప్రజలకు సూచించారు మోదీ.
