కొందరు పిల్లలు బడికి ఆటోలో వెళ్తారు. మరికొందరు పాఠశాల బస్సులో వెళ్తుంటారు. కానీ, మధ్యప్రదేశ్కు చెందిన ఓ బాలుడు మాత్రం తనకంటూ ప్రత్యేక మార్గం ఎంచుకున్నాడు. తమ ప్రాంతానికి బస్సులు రావని తెలిసి... ఎలాగైనా స్కూల్కు వెళ్లాలని గుర్రపు స్వారీ మొదలుపెట్టాడు.
ఇదీ జరిగింది....
బడి లేదు అనగానే సంబరపడిపోయే పిల్లలే ఎక్కువగా ఉంటారు. కానీ, మధ్యప్రదేశ్ ఖండ్వా ప్రాంతానికి చెందిన శివరాజ్ మాత్రం అందరిలా కాదు. 'పాఠశాలకు వెళ్లడం అక్కర్లేదు ఇంటి దగ్గరే ఉండు' అని తన తండ్రి చెప్పినా ఒప్పుకోలేదు. చదువుపై ఉన్న మక్కువతో ఎలాగైనా పాఠశాలకు వెళ్లాలనుకున్నాడు. కానీ, సైకిల్పై వెళ్తే కింద పడిపోతాడనే భయంతో ప్రత్యేక వాహనంపై తీసుకెళ్దామనుకున్నాడు బాలుడి తండ్రి. అయితే పెట్రోల్, డీజిల్ ఖర్చులు భరించేంత స్థోమత వారికి అసలే లేదు. ఈ నేపథ్యంలో శివరాజ్ ప్రత్యేక మార్గం ఎంచుకున్నాడు. ఓ చిన్న గుర్రాన్ని కొనివ్వమని వాళ్ల నాన్నని అడిగాడు. దీనికి ఒప్పుకున్న బాలుడి తండ్రి శివరాజ్కు అశ్వాన్ని కొనిచ్చాడు. అంతే... అందరిలా కాకుండా గుర్రంపై సవారీ చేస్తూ రాజసంగా పాఠశాలకు వెళ్తున్నాడు శివరాజ్.
ఇదీ చదవండి:'మంచు కురవడం వల్లే జలప్రళయం'
