భాజపా జాతీయ అధ్యక్షుడు అమిత్షా బంగాల్ కోల్కతాలో నిర్వహించిన రోడ్షోలో ఉద్రిక్తతలు తలెత్తాయి. 'బిదాన్ సరని' హాస్టల్ వద్ద కొంతమంది వామపక్ష, తృణమూల్ కాంగ్రెస్ కార్యకర్తలు అమిత్షా కాన్వాయ్పై రాళ్లు రువ్వారు. నల్ల జెండాలతో అమిత్షా 'గో బ్యాక్' అంటూ నినాదాలు చేశారు.
ఈ పరిణామంతో భాజపా కార్యకర్తలు ఆ హాస్టల్కి తాళం వేసి, గెరావ్ చేశారు. హాస్టల్ బయట ఉన్న వాహనాలకు నిప్పు అంటించారు. రాళ్లు రువ్వారు. ఈశ్వర చంద్ర విద్యాసాగర్ కళాశాల హాస్టల్ భవనాన్ని, ప్రతిమనూ భాజపా కార్యకర్తలు ధ్వంసం చేశారు.
ఈ పరిణామాలతో మరోసారి బంగాల్ భగ్గుమంది, వామపక్ష, తృణమూల్ కాంగ్రెస్ ఛత్ర పరిషత్ (టీఎమ్సీపీ) కార్యకర్తలు ప్రతిదాడి చేశారు. ఘర్షణ పెరిగి ఇరువర్గాలు పరస్పర దాడులకు పాల్పడ్డాయి. తక్షణం స్పందించిన పోలీసులు ఇరువర్గాలను చెదరగొట్టి, పరిస్థితులను అదుపులోకి తీసుకొచ్చారు.
'మమత దాడి చేయించారు'
అమిత్షా తన కాన్వాయ్పై జరిగిన దాడికి బంగాల్ ముఖ్యమంత్రి మమతా బెనర్జీనే కారణమని ఆరోపించారు.
"కోల్కతాలోని ప్రజలందరూ రోడ్లపైనే ఉన్నారు. దాదాపు 8 కి.మీ వరకు కాలు పెట్టడానికి కూడా ఖాళీ లేదు. ఇది చూసి తట్టుకోలేక.. మమతా నేతృత్వంలోని తృణమూల్ కాంగ్రెస్ పార్టీకి చెందిన గూండాలు అడ్డగించారు. నా కాన్వాయ్కు 200 మీటర్ల దూరంలో ఓ వైద్య కళాశాల ఉంది. అక్కడ గొడవ మొదలైంది. రాళ్లు రువ్వే ప్రయత్నం చేశారు. ఈ విధమైన హింసను మమతా బెనర్జీ సర్కారు పెంచుతోంది. అలానే బంగాల్ ప్రజలను నేను కోరేది ఒకటే... ఎన్నికలు చివరి అంకానికి చేరుకున్నాయి. ఈ హింసకు మీరు... శాంతితో, ఓటుతో సమాధానం ఇవ్వాలి. "- అమిత్షా , భాజపా జాతీయ అధ్యక్షుడు
ఆ సమయంలో పోలీసులు ఏమీ పట్టనట్లు వ్యవహరించారని, స్వామి వివేకానంద నివాసానికి తాను వెళ్లకుండా, తప్పు దారిపట్టించారని అమిత్షా ఆరోపించారు.
'అమిత్షాని ఏమనాలి'
అమిత్షా ఆరోపణలను తిప్పికొట్టారు బంగాల్ ముఖ్యమంత్రి మమతాబెనర్జీ. కమల దళపతిపై తీవ్ర వ్యాఖ్యలు చేశారు. విద్యాసాగర్ విగ్రహాన్ని భాజపా కార్యకర్తలు ధ్వంసం చేయడంపై బెహాలా ర్యాలీలో ఆగ్రహం వ్యక్తం చేశారు. నిరసనగా గురువారం ఆందోళన చేపట్టనున్నట్లు ప్రకటించారు.
"మీరు విద్యాసాగర్ (బంగాల్ పునరుజ్జీవన ఉద్యమకారుడు) మీద చేతులు వేస్తే మిమ్మల్ని ఏమనాలి. నేను మీ భావజాలాన్ని, సిద్ధాంతాన్ని ద్వేషిస్తాను."-మమతా బెనర్జీ, బంగాల్ ముఖ్యమంత్రి
ఇదీ చూడండి: వరుణుడి రాక ఆలస్యం- లోటు వర్షపాతం!
