'మోదీజీ.. సరిహద్దు దాటకుంటే ఘర్షణ ఎందుకైంది?'

సరిహద్దు ఘర్షణపై అఖిలపక్ష సమావేశం సందర్భంగా మోదీ ఇచ్చిన వివరణ గందరగోళానికి గురిచేసిందని అభిప్రాయపడ్డారు కాంగ్రెస్ సీనియర్ నేత చిదంబరం. భారత సరిహద్దులోకి ఇతరులెవరూ ప్రవేశించకుంటే ఘర్షణ ఎలా జరిగిందని ప్రశ్నించారు.

తూర్పు లద్దాక్ గల్వాన్​ లోయలో జరిగిన ఘర్షణపై ప్రధానమంత్రి నరేంద్రమోదీ ప్రకటన గందరగోళానికి, కలవరానికి గురిచేసిందన్నారు కాంగ్రెస్ సీనియర్ నేత చిదంబరం. గల్వాన్ లోయ అంతా తమదేనన్న చైనా వ్యాఖ్యలపై కేంద్రం సమాధానమేమిటని ప్రశ్నించారు.

అఖిలపక్ష సమావేశం సందర్భంగా 'లద్దాక్​ వద్ద ఇతరులెవరూ భారత్​లోకి ప్రవేశించలేదు' అన్న మోదీ వ్యాఖ్యలు అంతకుముందు సైన్యాధిపతి, రక్షణ, విదేశాంగ మంత్రులు చేసిన ప్రకటనలకు విరుద్ధంగా ఉన్నాయన్నారు చిదంబరం. ఒకవేళ ఎవరూ భారత భూభాగంలోకి ప్రవేశించకుంటే ఈ నెల 5,6 తేదిల్లో ఘర్షణ ఎందుకు జరిగిందని ప్రశ్నించారు.

భారత్, చైనా సైనిక కమాండర్ల మధ్య జరిగిన చర్చల వివరాలను బయటపెట్టాలని డిమాండ్ చేశారు చిదంబరం.

ఇదీ చూడండి: భారత గగనతలంలోకి పాక్​ డ్రోన్​.. కూల్చిన భద్రతా దళాలు