కరోనా అన్ని ఊర్లను చుట్టేసింది. కానీ, ఛత్తీస్గఢ్లోని ఆ గ్రామంలో మాత్రం దాని ప్రభావం ఇంతవరకు కనిపించలేదు. దానికి కారణమేంటని అక్కడి వాళ్లను అడిగితే.. తాము తలకు ఎరుపు రంగు పూసుకోవడమేనని అంటున్నారు.
ఛత్తీస్గఢ్ దుర్గ్ జిల్లాలోని మారుమూల గ్రామం సీర్నాభాథా. గౌరియా గోండ్ తెగకు చెందిన 300 మందికిపైగా అక్కడ నివసిస్తున్నారు. ఈ తెగలోని సగానికిపైగా జనం తమ తల వెంట్రుకలకు ఎరుపు రంగును అద్దుకున్నారు. చిన్నా, పెద్దా, ఆడా, మగా అని తేడాలేమీ లేకుండా అందరూ ఈ పద్ధతిని అనుసరిస్తున్నారు. ఇలా చేయడం వల్లే తాము కరోనా బారిన పడకుండా ఉంటున్నామని చెబుతున్నారు.
"తలకు ఎరుపురంగు పూసుకుంటే కరోనా మమ్మల్ని ఏం చెయ్యదని మాకు కలలో దైవం చెప్పింది. ఆ వెంటనే మేమంతా ఇలా ఎరుపు రంగు వేసుకున్నాం. కాబట్టే మా ఊరిలో కరోనా లేదు. అప్పటి నుంచి వైద్యుల అవసరం మాకు లేకుండా పోయింది. మేము ఇలా చేస్తున్నాం కాబట్టే మా ఊరి నుంచి కరోనా పారిపోయింది."
-- భూల్బాయ్, గ్రామస్థురాలు
"మా గ్రామంలో కరోనా లేనే లేదు. మేము ఐదారు నెలలుగా తల వెంట్రుకలకు ఎరుపు రంగు వేసుకుంటున్నాం. మాకు కలలో దేవుడు కనిపించి చెప్పాడు కాబట్టే మా దగ్గర కరోనా లేదు."
--దుర్గ, గ్రామస్థురాలు
సాంకేతికత ఎంత పెరుగుతున్నా.. ఇలా మూఢ నమ్మకాలను పాటించేవారు ఇంకా ఉన్నారంటే వింతగా అనిపించకపోదు. అయితే.. ఈ గ్రామంలో ఇప్పటి వరకు ఒక్క కరోనా కేసు కూడా నమోదు కాకపోవడం అందరినీ ఆశ్చర్యానికి గురి చేస్తోంది.
"ఇలా తలకు ఎరుపు రంగును ఎందుకు వేసుకుంటున్నారని మేం వాళ్లను అడిగాం. రామ్శీలా అనే మహిళకు కలలోకి దేవుడు వచ్చి చెప్పాడు కాబట్టే మేము ఇలా చేస్తున్నామని తెలిపారు. అప్పటి నుంచి మా ఊరిలో ఎవ్వరికీ కరోనా పాజిటివ్గా నిర్ధరణ కాలేదు. మార్చి నుంచి చాలా మందికి కరోనా పరీక్షలు నిర్వహించినప్పటికీ.. ఏ ఒక్కరికీ కొవిడ్ సోకినట్టు తేలలేదు."
--సీతారామ్ వర్మ, సీర్నాభాథా గ్రామ సర్పంచ్.
గమనిక: మూఢనమ్మకాలను ఈటీవీ భారత్ ప్రచారం చేయదు. కరోనాపై ప్రభుత్వం నిర్దేశించిన మార్గదర్శకాలను పాటించండి. బయటకు వెళ్లేటప్పుడు ముఖానికి మాస్కును ధరించండి. తరుచూ చేతులను శుభ్రం చేసుకోండి. భౌతిక దూరం పాటించండి. వైరస్ లక్షణాలు కనిపిస్తే వెంటనే వైద్యుడ్ని సంప్రదించండి.
ఇదీ చూడండి:భలే ఐడియా: పాత సీసాలతో టాయిలెట్లు
