భారత అంతరిక్ష పరిశోధన సంస్థ (ఇస్రో) అత్యంత ప్రతిష్ఠాత్మకంగా చేపట్టిన చంద్రయాన్-2లో మరో కీలక ఘట్టానికి రంగం సిద్ధమవుతోంది. ఈ మంగళవారమే చంద్రుడి కక్ష్యలోకి ప్రవేశించిన వాహకనౌక నుంచి.. 'విక్రమ్' ల్యాండర్ వేరు కానుంది. సెప్టెంబర్ 7న చంద్రుడిపై ల్యాండర్ దిగనుందని ఇస్రో అధినేత శివన్ వెల్లడించారు. తెల్లవారుజామున 1.55 గంటలకు ఈ ప్రక్రియ పూర్తవుతుందని ప్రకటించారు.
" విక్రమ్ ల్యాండర్ చంద్రుని ఉపరితలంపై దిగే ప్రక్రియ సెప్టెంబర్ 7, తెల్లవారుజామున 1.40కు మొదలై 1.55కు పూర్తవుతుందని భావిస్తున్నాం. అంతర్జాతీయంగా ఇది ఎంతో కీలక ప్రక్రియ. ఈ ఘట్టాన్ని పూర్తి చేసేందుకు ప్రతి ఒక్కరూ ఎంతో శ్రమిస్తున్నారు. "
- కే శివన్, ఇస్రో ఛైర్మన్
చంద్రుని కక్ష్యను ఈ బుధవారమే రెండోసారి తగ్గించుకున్న చంద్రయాన్-2.. కీలక ఘట్టానికి ముందే మరో మూడుసార్లు కక్ష్యను తగ్గించుకోనుంది. అనంతరం చంద్రుని ఉపరితలానికి 100 కిలోమీటర్ల దూరంలోని తుది ఆర్బిట్కు చేరుకుంటుంది. విక్రమ్ ల్యాండర్ సెప్టెంబర్ 2నే ఆర్బిటర్ నుంచి వేరై చంద్రుని చుట్టూ 100 కి.మీ X 30 కి.మీ ఆర్బిట్లోకి ప్రవేశించనుంది. అనంతరం సెప్టెంబర్ 7న జాబిల్లి ఉపరితలంపై దిగనుందని ఇస్రో ప్రకటించింది.
ప్రధానికి ఆహ్వానం..
విక్రమ్ ల్యాండర్ చందమామపై దిగే అద్భుత ఘట్టానికి హాజరవ్వాలని ప్రధాని మోదీకి ఆహ్వానం పంపినట్లు శివన్ తెలిపారు. ఇస్రో సంస్థలో లింగభేదాలు లేవని.. చంద్రయాన్-2 ప్రయోగ సమయంలో ఇద్దరు మహిళలకు అవకాశం దక్కిందని గుర్తుచేశారు శివన్. భవిష్యత్తులో జరగబోయే ప్రతిష్ఠాత్మక ప్రాజెక్టుల్లోనూ మహిళా శాస్త్రవేత్తలను భాగస్వాములను చేస్తామని స్పష్టం చేశారు.
శివన్కు కలాం అవార్డు..
తమిళనాడు ప్రభుత్వం ప్రదానం చేసే డాక్టర్‌ ఏపీజే అబ్దుల్‌ కలాం పురస్కారాన్ని ఇస్రో ఛైర్మన్ కే శివన్ అందుకున్నారు. శాస్త్ర సాంకేతిక రంగాల్లో సేవలందించినందుకు గానూ.. గురువారం ఉదయం ఈ అవార్డును శివన్కు అందజేసింది తమిళనాడు ప్రభుత్వం. 5 గ్రాములు విలువ చేసే బంగారు పతకం, 5 లక్షల రూపాయల నగదును ఇస్రో అధినేతకు అందజేశారు ముఖ్యమంత్రి పళనిస్వామి.
ఇదీ చూడండి : 'మెజారిటీ ఉందని ప్రజలను రాజీవ్ భయపెట్టలేదు'
