ఛత్తీస్గఢ్ బిజాపుర్ జిల్లా పరిధిలో నలుగురు గిరిజనులను నక్సలైట్లు హత్య చేశారు. గంగలూర్‌ పోలీసు ఠాణా పరిధిలోని దుమ్రి-పల్నార్ గ్రామం సమీపంలోని అటవీ ప్రాంతంలో రెండ్రోజుల వ్యవధిలో ఈ హత్యలు జరిగినట్లు పోలీసులు వెల్లడించారు.
ఇన్ఫార్మర్ల నెపంతో...
రెండురోజుల క్రితం ఆ చుట్టుపక్కల రెండు గ్రామాల్లోని కొందరిని నక్సలైట్లు మాట్లాడేందుకు పిలిపించుకున్నారు. వీరందరూ అక్కడి రోడ్ల నిర్మాణానికి, అభివృద్ధి కార్యక్రమాలకు సహకరిస్తున్నారు. వారిపై ప్రజాకోర్టులో విచారణ అనంతరం పోలీస్ ఇన్ఫార్మర్ల నెపంతో నక్సలైట్లు చంపారు.
మృతులు పున్సార్‌, మెతపల్‌ గ్రామాలకు చెందిన వారు. వీరందరినీ ఒకేసారి చంపారా లేదా వేర్వేరు సమయాల్లో చంపారా అన్నది తేలాల్సి ఉంది. నక్సలైట్ల దగ్గర మరికొందరు గిరిజనులు బందీలుగా ఉన్నట్లు తెలుస్తోంది.
