కేంద్రం ప్రతిష్ఠాత్మకంగా చేపట్టిన పార్లమెంటు నూతన భవన నిర్మాణానికి మూడు కంపెనీలు ఆన్లైన్ బిడ్లు దాఖలు చేసేందుకు ఎంపికయ్యాయి. మొత్తం 7 కంపెనీలు ఆసక్తి చూపగా లార్సెన్ అండ్ టబ్రో, షాపుర్జీ పల్లోంజి, టాటా సంస్థలు అర్హత సాధించాయని కేంద్ర ప్రజాపనుల శాఖ స్పష్టం చేసింది.
2022 నాటికి..
పార్లమెంటు, రాష్ట్రపతి భవన్, మంత్రులు, ఎంపీల నివాసాల కోసం సెంట్రల్ విస్టా రీడెవలప్మెంట్ ప్రాజెక్టు చేపట్టింది మోదీ ప్రభుత్వం. దీనికింద దిల్లీలోని పార్లమెంటు హౌస్ స్టేట్లోని 118 ప్లాట్ నంబర్లో కొత్త భవనాన్ని నిర్మించనుంది.
ఈ భవనంలో గ్రౌండ్, బేస్మెంట్తో రెండు అంతస్తులు ఉంటాయి. 2022లో 75వ స్వాతంత్ర్య దినోత్సవాల సమయానికి ఈ భవనం సిద్ధం చేయాలని కేంద్రం భావిస్తోంది.
పనులు ముమ్మరం..
ఇప్పటికే ప్రాజెక్టుకు అవసరమైన భూములకు సంబంధించి దిల్లీ అభివృద్ధి ప్రాధికార సంస్థ ఆమోదం తెలిపింది. పార్లమెంటు కొత్త భవన నిర్మాణంతో పాటు ఇతర ప్రాజెక్టులను వేగంగా పూర్తి చేసేందుకు కేంద్రం సన్నాహాలు చేస్తోంది.
ఇదీ చూడండి: మోదీ 2.0: పాలన కేంద్రంగా సెంట్రల్ విస్టా
