సార్వత్రిక ఎన్నికల ఫలితాల ముందు సమాజ్వాదీ పార్టీ అగ్రనేత ములాయం సింగ్ యాదవ్, ఆ పార్టీ అధ్యక్షుడు అఖిలేశ్ యాదవ్‌లకు భారీ ఊరట లభించింది. ఆదాయానికి మించిన ఆస్తుల కేసులో వీరిద్దరికీ సీబీఐ క్లీన్చిట్ ఇచ్చింది. ఈ మేరకు వారిపై నమోదైన కేసులో సుప్రీంకోర్టులో అఫిడవిట్ దాఖలు చేసింది కేంద్ర దర్యాప్తు సంస్థ.
ములాయం, అఖిలేశ్లు ఆదాయానికి మించి ఆస్తులు సంపాదించినట్లు ఎలాంటి ఆధారాలులేవని తెలిపింది సీబీఐ. వీరిద్దరూ ఆదాయానికి మించిన ఆస్తులు కూడగట్టారని 2005లో విశ్వనాథ్‌ చతుర్వేది సుప్రీం కోర్టులో పిటిషన్ వేశారు. ఆ పిటిషన్‌ను పరిగణలోకి తీసుకున్న సుప్రీంకోర్టు.. ములాయం, అఖిలేశ్పై విచారణ చేపట్టాలని 2007లో సీబీఐని ఆదేశించింది.
కేసు పురోగతిపై అఫిడవిట్ దాఖలు చేయాలని ఈ ఏడాది ఏప్రిల్ 11న సీబీఐని ఆదేశించింది సర్వోన్నత న్యాయస్థానం. తాజాగా ప్రమాణపత్రం దాఖలు చేసిన సీబీఐ... ములాయం, అఖిలేశ్ అక్రమాస్తులపై ఆధారాలు లేవని సుప్రీంకోర్టుకు తెలిపింది. 2013లోనే ఆ కేసును ముగించినట్లు వివరించింది.
- ఇదీ చూడండి: రాజీవ్కు కాంగ్రెస్ నేతల నివాళులు- మోదీ ట్వీట్
