బిహార్ శాసనసభ ఎన్నికలు సమీపిస్తున్న వేళ భారతీయ జనతా పార్టీ సమగ్ర ప్రణాళికను రూపొందిస్తోంది. వర్చువల్, ఆన్లైన్ వేదికల ద్వారా ప్రజలను చేరుకునేందుకు ప్రయత్నాలు మొదలుపెట్టింది. ఇందుకోసం 'కమల్ కనెక్ట్'ను విస్తృతంగా వినియోగించాలని నిర్ణయించింది.
అనేక హంగులతో..
ఈ యాప్ను తక్కువ డేటా వినియోగించే విధంగా రూపొందించారు. ఇంటర్నెట్ వేగం తక్కువగా ఉండే మారుమూల ప్రాంతాల్లోనూ దీనిని ఉపయోగించవచ్చు. దీని ద్వారా రాష్ట్రంలో చేపట్టిన అభివృద్ధి పనులను, ప్రధాని నరేంద్ర మోదీ ప్రభుత్వంలో ఎంత మంది లబ్ధిపొందారో పొందుపరిచారు. గత ఆరేళ్లలో బిహార్ కోసం కేంద్రం చేసిన కృషిని కూడా ఈ యాప్ వివరిస్తుంది.
అంతేకాకుండా, భాజపా నేతల బహిరంగ ప్రసంగాలను కూడా ప్రజలకు చేరడానికి ఈ యాప్ను ఉపయోగించనున్నారు. ప్రజల సమస్యలపై స్పందించే ఏర్పాటు చేశారు. ఫేస్‌బుక్, ట్విట్టర్, ఇన్‌స్టాగ్రామ్ వంటి సామాజిక మాధ్యమ వేదికలనూ దీనికి అనుసంధానం చేయనున్నారు.
వ్యూహం పనిచేస్తుందా..
దిల్లీ శాసనసభ ఎన్నికల్లోనూ ఇలాంటి యాప్లను భాజపా వినియోగించింది. అయితే ఆ సమయంలో వీటిని ప్రజలు ఎక్కువగా వినియోగించలేదు. ప్రస్తుతం కరోనా సమయంలో ఈ డిజిటల్ వేదిక ప్రయోజనం చేకూర్చుతుందని భాజపా నాయకత్వం భావిస్తోంది. అయితే బిహార్లో సాంకేతికత వినియోగం తక్కువగా ఉండటం భాజపాకు సవాలుగా మారనుంది.
బిహార్ ఎన్నికలు..
ఈ ఏడాది అక్టోబర్-నవంబర్ సమయంలో బిహార్ ఎన్నికలు జరగనున్నాయి. షెడ్యూల్ ప్రకారమే బిహార్ ఎన్నికలు జరుగుతాయని ప్రధాన ఎన్నికల కమిషనర్ ఆగస్టు 11న స్పష్టం చేశారు.
ఇదీ చూడండి: బిహార్ ఎన్నికల వాయిదాపై పిటిషన్ కొట్టివేత
