భాజపా సీనియర్ నేత, కేంద్ర మాజీ మంత్రి సుష్మా స్వరాజ్(67) మంగళవారం రాత్రి కన్నుమూశారు. గుండెపోటు రావడంతో తీవ్ర అస్వస్థతకు గురయ్యారు. వెంటనే కుటుంబసభ్యులు ఆమెను దిల్లీ ఎయిమ్స్కు తరలించారు. వైద్యులు అత్యవసర చికిత్స అందించినా ఫలితం లేకపోయింది. చికిత్స పొందుతూ రాత్రి 10.50 గంటలకు మృతి చెందినట్లు ప్రకటించారు డాక్టర్లు.
సుష్మా స్వరాజ్కు భర్త, కుమార్తె ఉన్నారు. ఇటీవలే సుష్మా స్వరాజ్ మూత్రపిండాల మార్పిడి చికిత్స చేయించుకున్నారు. అనారోగ్య కారణాలతో 2019లో జరిగిన సాధారణ ఎన్నికల్లో పోటీకి దూరంగా ఉన్నారు మాజీ విదేశాంగ మంత్రి.
2014-19 మధ్య విదేశీ వ్యవహారాల శాఖ మంత్రిగా పనిచేశారు సుష్మా స్వరాజ్. 2009-14 మధ్య లోక్సభలో ప్రతిపక్ష నేతగా కొనసాగారు. 2000-03 మధ్య వాజ్పేయీ ప్రభుత్వ హయాంలో సమాచార ప్రసార శాఖ మంత్రిగా బాధ్యతల్లో ఉన్నారు. దిల్లీకి 1998లో ముఖ్యమంత్రిగా ఎన్నికయ్యారు.
ప్రముఖులు సంతాపం...
సుష్మా స్వరాజ్ ఆకస్మిక మృతితో ప్రముఖ రాజకీయ నేతలు విచారం వ్యక్తం చేశారు. ప్రధాని నరేంద్ర మోదీ, రాష్ట్రపతి రామ్నాథ్ కోవింద్, కాంగ్రెస్ నేత రాహుల్ గాంధీ, కేంద్ర హోం మంత్రి అమిత్ షా సహా పలువురు కేంద్ర మంత్రులు.. సీనియర్ నేతలు ఆవేదన వ్యక్తం చేశారు.
ప్రజా సేవ, పేదల అభ్యున్నతి కోసం తన జీవితాన్ని అంకితం చేసిన గొప్ప నాయకురాలని కొనియాడారు ప్రధాని.
సుష్మా స్వరాజ్ అసాధారణ నాయకురాలు, గొప్ప వక్త అన్నారు రాహుల్ గాంధీ. పార్టీలకతీతంగా అందరితో స్నేహ సంబంధాలు కొనసాగించారని ట్వీట్ చేస్తూ.. మృతి పట్ల దిగ్భ్రాంతి వ్యక్తం చేశారు.
లోధిరోడ్ శ్మశాన వాటికలో అంత్యక్రియలు
సుష్మా స్వరాజ్ అంత్యక్రియలు ఇవాళే నిర్వహించనున్నారు. సాయంత్రం దిల్లీ లోధి రోడ్డులోని శ్మశాన వాటికలో ప్రభుత్వ లాంఛనాలతో కడసారి వీడ్కోలు పలకనున్నారు. చికిత్స పొందుతూ మృతి చెందిన అనంతరం.. ఆమె భౌతిక కాయాన్ని దిల్లీ జంతర్ మంతర్లోని నివాసానికి తరలించారు. మధ్యాహ్నం 12 గంటల వరకు అక్కడే ఉంచుతారు.
మధ్యాహ్నం 12 గంటల తర్వాత భాజపా కార్యాలయానికి తరలించనున్నారు. 3 గంటల వరకు భౌతిక కాయాన్ని అక్కడే ఉంచనున్నారు. అనంతరం.. ప్రభుత్వ అధికార లాంఛనాలతో అంత్యక్రియలు నిర్వహించనున్నారు.
