ఉన్నావ్ బాధితురాలికి దేశవ్యాప్తంగా మద్దతు పెరుగుతోంది. బాధితురాలికి సత్వర న్యాయం జరగాలని రోజురోజుకు అనేక మంది డిమాండ్ చేస్తున్నారు. ఈ సమయంలో ఉన్నావ్ అత్యాచార నిందితుడు కుల్దీప్ సెంగార్కు సానుభూతి ప్రకటించారు ఉత్తర్ప్రదేశ్ భాజపా ఎమ్మెల్యే ఆశిష్ సింగ్ ఆశు. ఇలాంటి గడ్డు పరిస్థితుల నుంచి సెంగార్ తొందరగా బయటపడాలని ఆకాంక్షించారు.
"మన సోదరుడు కుల్దీప్ ఇప్పుడు మన మధ్య లేకపోవచ్చు. గడ్డు పరిస్థితులపై పోరాటం చేసి తిరిగి బయటకు వస్తారని ఆశిస్తున్నాం. మేము ఎక్కుడున్నా... కుల్దీప్ కోసం ప్రార్థిస్తాం."
--- ఆశిష్ సింగ్ ఆశు, భాజపా ఎమ్మెల్యే.
ఉన్నావ్లో శుక్రవారం జరిగిన ఓ సమావేశంలో ఈ వ్యాఖ్యలు చేశారు ఆశిష్. ఈ ఘటనకు సంబంధించిన వీడియో సామాజిక మాధ్యమాల్లో చక్కర్లు కొడుతోంది.
'భాజపాకు సంబంధం లేదు...'
ఆశిష్ సింగ్ వ్యాఖ్యలపై తీవ్ర దుమారం రేగింది. ఈ నేపథ్యంలో ఎమ్మెల్యే చేసిన వ్యాఖ్యలతో పార్టీకి సంబంధం లేదని భాజపా ప్రకటించింది. ఆ వ్యాఖ్యలు వ్యక్తిగతమేనని, పార్టీతో ముడిపెట్టవద్దని భాజపా ప్రతినిధి రాకేష్ త్రిపాఠి స్పష్టం చేశారు.
బాధితురాలి పరిస్థితి విషమం..
జులై 28న జరిగిన రోడ్డు ప్రమాదంలో తీవ్రంగా గాయపడ్డ ఉన్నావ్ అత్యాచార బాధితురాలి పరిస్థితి విషమంగా ఉందని వైద్యులు తెలిపారు. న్యుమోనియా వ్యాధి సోకడం వల్ల పరిస్థితి మరింత విషమించిందని వివరించారు.
న్యాయవాదికి వెంటిలేటర్ సహాయం తొలగించారు డాక్టర్లు. అయినా న్యాయవాది ఆరోగ్యంపై ఇప్పుడప్పుడే స్పష్టత ఇవ్వలేమని వెల్లడించారు.
ఇదీ చూడండి:- 'ఉన్నావ్' కేసులో పోలీసులకు లంచాలు..!
