దేశవ్యాప్తంగా భాజపాను బలోపేతం చేయడమే లక్ష్యంగా ఆ పార్టీ జాతీయ అధ్యక్షుడు జేపీ నడ్డా చేపట్టనున్న 100రోజుల పర్యటన ఈ నెల 26న ప్రారంభంకానుంది. ఈశాన్య రాష్ట్రమైన అసోం నుంచి ఈ పర్యటనను మొదలుపెట్టనున్నారు నడ్డా. పార్టీకి సంబంధించిన ప్రణాళికలు రూపొందించేందుకు ఆ రాష్ట్ర భాజపా నాయకులతో వ్యూహాత్మక సమావేశం నిర్వహించనున్నారు.
రెండు రోజుల అసోం పర్యటన అనంతరం.. నవంబర్ 28న మిజోరంకు వెళ్లనున్నారు నడ్డా. ఆ తర్వాత మేఘాలయ, నాగాలాండ్ రాష్ట్రాల్లో పర్యటించే అవకాశముంది. ఈశాన్య రాష్ట్రాల్లో భాజపాను బలోపేతం చేసేందుకు నడ్డా పర్యటన ఉపయోగపడుతుందని పార్టీ శ్రేణులు భావిస్తున్నారు.
బంగాల్లో వచ్చే ఏడాది జరిగే శాసనసభ ఎన్నికల అనంతరం.. అసోం, కేరళ, పుదుచ్ఛేరి, తమిళనాడు రాష్ట్రాల్లోనూ ఎన్నికలు జరగనున్న నేపథ్యంలో భాజపా ఈ కార్యక్రమాలు చేపట్టింది. అయితే కొవిడ్ నేపథ్యంలో ఏ సమావేశంలోనైనా 200 మందికి మించి ప్రజలు ఉండకూడదని పార్టీ వర్గాలు సూచించాయి.
2024 లోక్సభ ఎన్నికల్లో గెలుపొందడటం, ముఖ్యంగా 2019 ఎన్నికల్లో ఓటమి పాలైన రాష్ట్రాల్లో విజయం సాధించాలనే సంకల్పంతో నడ్డా తన పర్యటనను సాగించనున్నారు.
ఇదీ చదవండి: 'ఎన్నికల్లో భాజపా- అన్నాడీఎంకే కూటమిదే విజయం'
