'మోదీ సినిమా చూసి నిర్ణయం చెప్పండి'

'పీఎం నరేంద్ర మోదీ' చిత్రాన్ని చూసి నిషేధించాలో లేదో నిర్ణయం తీసుకోవాలని కేంద్ర ఎన్నికల సంఘాన్ని సర్వోన్నత న్యాయస్థానం ఆదేశించింది. చిత్రంపై ఈసీ విధించిన స్టేకు వ్యతిరేకంగా దాఖలైన పిటిషన్​పై విచారణలో ఈ వ్యాఖ్యలు చేసింది.

ప్రధాని నరేంద్రమోదీ జీవితచరిత్ర ఆధారంగా తెరకెక్కిన 'పీఎం నరేంద్ర మోదీ' చిత్రాన్ని పూర్తిగా చూసి నిషేధించాలో లేదో నిర్ణయం తీసుకోవాలని కేంద్ర ఎన్నికల సంఘాన్ని సర్వోన్నత న్యాయస్థానం ఆదేశించింది. ఈనెల 19లోపు నిర్ణయాన్ని సీల్డ్​ కవర్లో సమర్పించాలని సూచించింది.

ఎన్నికల సమయంలో చిత్ర విడుదలను ఈసీ నిషేధించడాన్ని వ్యతిరేకిస్తూ చిత్ర నిర్మాతలు దాఖలు చేసిన పిటిషన్​పై సుప్రీంకోర్టు విచారణ చేపట్టింది.
ఎన్నికల సంఘం పూర్తి సినిమాను చూడలేదని ప్రోమోను మాత్రమే చూసి నిర్ణయం తీసుకుందని పిటిషనర్​​ తరఫు న్యాయవాది ముకుల్ రొహత్గి వాదించారు. పూర్తి సినిమాను చూసి నిర్ణయం తీసుకోవాలని అభ్యర్థించారు. ఇందుకు సుప్రీం సానుకూలంగా స్పందించింది. విచారణను ఈ నెల 22కు వాయిదా వేసింది.

• ఇదీ చూడండి: జయప్రదపై ఆజం​ఖాన్ అనుచిత వ్యాఖ్యలు