బిహార్ శాసనసభ ఎన్నికల్లో మహాకూటమి మూడింట రెండొంతుల మెజారిటీ సాధిస్తుందని ధీమా వ్యక్తంచేశారు ఆర్జేడీ నేత తేజస్వీ యాదవ్. అధికారంలోకి వచ్చాక యువతకు ఉద్యోగాలు కల్పించడమే తమ తొలి ప్రాధాన్యమని తెలిపారు. ఇటీవల కేంద్ర తీసుకువచ్చిన వ్యవసాయ చట్టాల్ని వ్యతిరేకిస్తూ రాష్ట్రంలో నూతన చట్టాలను తొలి అసెంబ్లీ సమావేశాల్లోనే తీసుకువస్తామన్నారు.
ఇన్నాళ్ల తమ కృషి నవంబర్ 10న ఫలిస్తుందని తేజస్వీ ఆశాభావం వ్యక్తం చేశారు. ఆ రోజు బిహార్ ప్రజలు సరికొత్త చరిత్రను లిఖిస్తారన్నారు. ఉద్యోగ కల్పన సహా మరిన్ని విషయాలపై పీటీఐ వార్తా సంస్థకు ఇచ్చిన ఇంటర్వూలో కీలక వ్యాఖ్యలు చేశారు.
"బిహార్ యువతకు 10 లక్షల ఉద్యోగాలు కల్పిస్తామని హామీ ఇవ్వడం చరిత్రలో ఇదే తొలిసారి. అధికారంలోకి వస్తే తొలి కేబినెట్ భేటీలోనే దీనికి ఆమోదం తెలుపుతాం. ప్రజల ఆశీర్వాదం, మద్దతు మాకుందని ఎన్నికల ప్రచారంలో అర్థమైంది. మాపై పెద్ద బాధ్యతను ఉంచడానికి వాళ్లు నిర్ణయం తీసుకున్నారు. మా కూటమి మూడింట రెండొంతుల మెజార్టీ సాధించడం తథ్యం. చాలా నియోజకవర్గాల్లో ఎన్డీఏ అభ్యర్థులకు డిపాజిట్లు గల్లంతవుతాయి. నవంబర్ 10న చూడండి. బిహార్ సరికొత్త నేతను చూస్తుంది."
- తేజస్వీ యాదవ్, మహాకూటమి సీఎం అభ్యర్థి
నితీశ్పై విమర్శలు...
15 ఏళ్ల పాలనలో నితీశ్.. విద్యా, ఉద్యోగం, ఆరోగ్యం వంటి కీలక రంగాలను నిర్లక్ష్యం చేశారని తేజస్వీ ఆరోపించారు. తాము అధికారంలోకి వస్తే వీటిపైనే ఎక్కువగా దృష్టి సారిస్తామన్నారు.
చిరాగ్తో దోస్తీపై...
లోక్ జనశక్తి పార్టీ అధినేత చిరాగ్ పాస్వాన్తో ఎన్నికల అనంతరం పొత్తు పెట్టుకునే అవకాశం ఉందా అన్న ప్రశ్నను తేజస్వీ కొట్టిపారేశారు. నితీశ్ కుమార్ స్థానంలో భాజపా అభ్యర్థిని సీఎంగా కూర్చోబెట్టేందుకే పాస్వాన్ ప్రయత్నిస్తున్నారని తెలిపారు.
మోదీ ప్రచారంపై...
మోదీ ప్రచారం ఎన్డీఏ అభ్యర్థులకు కలిసివస్తుందన్న వ్యాఖ్యలను తేజస్వీ తోసిపుచ్చారు. పన్నెండున్నర కోట్ల బిహార్ జనాభా ఇప్పటికే ఒక నిర్ణయం తీసుకున్నారన్నారు. నిరుద్యోగం, వలసవాదం, అవినీతి, పేదరికం వంటి అంశాలనే దృష్టిలో పెట్టుకునే ప్రజలు ఓటు వేస్తారని అభిప్రాయపడ్డారు.
బిహార్ శాసనసభ సమరం మూడు దశల్లో జరగనుంది. తొలి దశ పోలింగ్ బుధవారం అవుతుంది. నవంబర్ 10న ఫలితాలు వెలువడనున్నాయి.
- ఇదీ చూడండి: కరోనా వేళ తొలి దశ పోలింగ్కు 'బిహార్' సిద్ధం
