బంగాల్లో ఉద్రిక్తతలకు దారితీసిన విగ్రహ ధ్వంసం కేసులో విచారణను వేగవంతం చేస్తోంది అక్కడి ప్రభుత్వం. కోల్కతాలో భాజపా సభ సందర్భంగా ఓ కళాశాలలోని ప్రముఖ సంఘ సంస్కర్త ఈశ్వర చంద్ర విద్యాసాగర్ విగ్రహం ధ్వంసమయింది. ఈ విషయంలో నిజాలను నిగ్గుతేల్చేందుకు ఐదుగురు సభ్యులతో కమిటీని ఏర్పాటు చేసినట్లు బంగాల్ సీఎం మమతా బెనర్జీ తెలిపారు.
"ఎన్నికల వేళ విద్యాసాగర్ విగ్రహాన్ని దుండగులు ధ్వంసం చేశారు. మేం ఓ కమిటీని నియమించాం. అప్పుడు జరిగిన సంఘటనలు, కారణాలపై కమిటీ విచారిస్తుంది. ఈ కేసులో ఇప్పటికే 35 మందిని అదుపులోకి తీసుకున్నాం. రెండు ఎఫ్ఐఆర్లు నమోదు చేశాం."
-మమతా బెనర్జీ, బంగాల్ ముఖ్యమంత్రి
కమిటీ సభ్యుల్లో కొత్తగా నియమితులైన హోంశాఖ కార్యదర్శి ఆలాపన్ బంధ్యోపాధ్యాయ్, కోల్కతా సీపీ అనుజ్ శర్మ, అదనపు సీపీ జావేద్ షమీన్, విద్యాసాగర్ కళాశాల ప్రధానోపాధ్యాయులు గౌతం కుందూ ఉన్నారు.
రాష్ట్రంలో భారీగా బదిలీలు
రాష్ట్ర హోంశాఖ నూతన కార్యదర్శిగా ఆలాపన్ బంధ్యోపాధ్యాయ్ను నియమించింది బంగాల్ ప్రభుత్వం. వీరితో పాటు పలువురు ఐఏఎస్, ఐపీఎస్ సహా 10 మంది జిల్లా మేజిస్ట్రేట్లను బదిలీ చేసింది.
