అయోధ్య కేసు న్యాయవాదికి బెదిరింపులపై సుప్రీం నోటీసులు

అయోధ్య కేసులో ముస్లింల తరఫున వాదనలు వినిపించకూడదని బెదిరింపులు వస్తున్నాయని న్యాయవాది రాజీవ్ ధావన్ దాఖలు చేసిన పిటిషన్​పై స్పందించింది సుప్రీంకోర్టు. రాజీవ్ ఆరోపణలకు సమాధానమివ్వాలని కోరుతూ ఇద్దరికి నోటీసులు జారీ చేసింది.

అయోధ్య భూవివాదం కేసు వాదించొద్దంటూ బెదిరించారని సీనియర్ న్యాయవాది రాజీవ్ ధావన్​ వేసిన ఫిర్యాదుపై స్పందించింది సుప్రీంకోర్టు. ధావన్ ఆరోపణలపై వివరణ ఇవ్వాలని ఇద్దరు వ్యక్తులకు నోటీసులు జారీ చేసింది.

అయోధ్య భూవివాదం కేసులో ముస్లింల తరఫున వాదనలు వినిపించొద్దని 2019 ఆగస్టు 14న విశ్రాంత విద్యా అధికారి ఎన్​. శణ్ముగమ్​ నుంచి తనకు లేఖ అందిందని ఫిర్యాదు చేశారు ధావన్. రాజస్థాన్ వాసి సంజయ్​ కలాల్ వాట్సాప్ సంక్షిప్త సమాచారంలో కేసు వాదించొద్దని బెదిరింపులకు గురిచేసినట్లు పిటిషన్​లో పేర్కొన్నారు రాజీవ్​. సున్నీ వక్ఫ్ బోర్డు తరఫున వాదించొద్దని హెచ్చరించినట్లు తెలిపారు.

బెదిరించివారిపై కోర్టు ధిక్కరణ చర్యలు తీసుకోవాలని కోరుతూ పిటిషన్ దాఖలు చేశారు. రాజీవ్ పిటిషన్​పై విచారించిన సుప్రీం... ఆరోపణలపై వివరణ ఇవ్వాలని ప్రతివాదులను ఆదేశించింది.

ఇదీ చూడండి: 'విక్రమ్'​ తొలి కక్ష్య విజయవంతంగా తగ్గింపు