దక్షిణ కశ్మీర్లోని బందిపొర జిల్లా హజీన్లో తనిఖీలు చేస్తోన్న భద్రతా బలగాలపై కాల్పులు జరిపారు ముష్కరులు. బదులుగా బలగాలు దీటుగా స్పందించాయి. సైన్యం నుంచి తప్పించుకునేందుకు ఓ ఇంట్లోకి దూరిన దుండగులు తుపాకులతో బెదిరించి ఆ ఇంట్లో వారిని రక్షణ కవచంలా వాడుకున్నారు.
ఇదేం పైత్యం
ఆ ఇంట్లోని ఓ అమ్మాయిపై అఘాయిత్యానికి యత్నించారు. కుటుంబసభ్యుల సహాయంతో ఎలాగోలా తప్పించుకున్న ఆ యువతి పోలీసులను ఆశ్రయించింది. ఆగ్రహించిన ముష్కరులు కుటుంబాన్ని చిత్రహింసలు చేయడం మొదలుపెట్టారు. ముందుగా ఆ కుటుంబాన్ని బయటకు తీసుకురావడానికి అధికారులు ప్రయత్నించారు. కష్టపడి కుటుంబాన్ని మొత్తం బయటకు తీసుకురాగలిగారు.
కానీ ఉగ్రవాదుల చెరలో ఓ బాలుడు చిక్కుకుపోయాడు. పోలీసులు ముందుగా బాలుడిని విడిచి పెట్టాలని హెచ్చరించారు. కానీ ఉగ్రవాదులు ఖాతరు చేయలేదు. అనంతరం ఆ గ్రామ పెద్ద బాలుడిని విడిచి పెట్టాలని దీనంగా వేడుకున్నాడు. కానీ కరుడుగట్టిన ముష్కరులు కించిత్ కూడా కనికరించలేదు. అత్యంత పాశవికంగా 12ఏళ్ల ఆతిఫ్ మహ్మద్ మీర్ను పొట్టనబెట్టుకున్నారు.
కమాండోల గుళ్ల వర్షం
బాలుడిని హతమార్చిన ఉగ్రవాదులకు తప్పించుకునే దారి లేకపోయింది. వెనువెంటనే ఉగ్రవాదులపై విరుచుకుపడ్డాయి భద్రతా బలగాలు. తూటాల వర్షంతో ఆ ఇద్దరు ముష్కరుల్ని మట్టుబెట్టారు జవాన్లు.
