అసోం బార్పేటలో 600 గ్రామాలు జలమయం

భారీ వర్షాలకు అసోం రాష్ట్రంలో జనజీవనం అస్తవ్యస్తమయింది. వరదలకు లక్షల మంది నిరాశ్రయులయ్యారు. బార్పేట జిల్లాలో కురిసిన భారీ వర్షాలకు సుమారు 600 గ్రామాలు నీటమునిగాయి. నల్బారీ జిల్లాలో లోతట్టు ప్రాంతాలు జలమయమయ్యాయి.

ఎడతెరిపిలేని వర్షాలకు అసోంలో నదులు ఉప్పొంగి, జనావాసాలను వరదలు ముంచెత్తుతున్నాయి. బ్రహ్మపుత్ర నది, ఉపనదులు ప్రమాదకర స్థాయిలో ఉద్ధృతంగా ప్రవహిస్తున్నాయి. తాజాగా భారీ వర్షాలకు బార్పేట జిల్లాలో 600 గ్రామాలు నీటమునిగాయి. వేల మంది నిరాశ్రయులయ్యారు.

నల్బారీ జిల్లాలోని లోతట్టు ప్రాంతాలు జలమయమయ్యాయి. చమత-కైతల్కుచి రోడ్డుపై భారీగా వరద నీరు చేరి, రవాణా వ్యవస్థ స్తంభించింది. జనాలు అవస్థలు పడుతున్నారు.

సహాయక చర్యలు ముమ్మరం చేశారు అధికారులు. వరదల్లో చిక్కుకున్న వారిని సురక్షిత ప్రాంతాలకు తరలిస్తున్నారు. బార్పేట జిల్లాలో ప్రత్యేక వైద్య శిబిరాలు ఏర్పాటు చేసి ఎలాంటి వ్యాధులు సంక్రమించకుండా చర్యలు చేపట్టారు.

ఇదీ చూడండి: అసోంను ఆదుకుంటాం: ప్రధాని నరేంద్ర మోదీ