క్షణక్షణానికి మలుపులు తిరుగుతున్న మహారాష్ట్ర రాజకీయం ఇప్పుడు సుప్రీం కోర్టుకు చేరింది. ప్రభుత్వ ఏర్పాటుకు ఆలస్యమవుతున్నందున గవర్నర్ భగత్ సింగ్ కోశ్యారీ.. రాష్ట్రంలో రాష్ట్రపతి పాలనకు సిఫార్సు చేశారు. రాష్ట్రపతికి నివేదిక అందజేశారు. ప్రభుత్వాన్ని ఏర్పాటు చేయడంలో పార్టీలు విఫలమైనందున కేంద్ర కేబినెట్ కూడా.. గవర్నర్ సిఫార్సును ఆమోదించింది.
అయితే... గవర్నర్ నిర్ణయాన్ని సవాల్ చేస్తూ సుప్రీం కోర్టులో పిటిషన్ దాఖలు చేసింది శివసేన. ప్రభుత్వ ఏర్పాటుకు అవసరమైన మద్దతు కూడగట్టుకునేందుకు అదనపు గడువు కోరితే గవర్నర్ ఇవ్వనందుకు సేన.. సర్వోన్నత న్యాయస్థానాన్ని ఆశ్రయించింది. గవర్నర్ నిర్ణయం రాజ్యాంగ విరుద్ధమని ఆరోపించిన సేన.. ఈ పిటిషన్పై అత్యవసరంగా విచారణ చేపట్టాలని కోరింది. శివసేన తరఫున కాంగ్రెస్ సీనియర్ నేత కపిల్ సిబల్ వాదించనున్నారు.
శివసేనకు కాంగ్రెస్ షాక్..
గవర్నర్ ఇచ్చిన గడువులోగా ఎన్సీపీ, కాంగ్రెస్ మద్దతు కోసం శివసేన చేసిన ప్రయత్నాలు ఫలించలేదు. అయితే ప్రభుత్వ ఏర్పాటుకు తాము సిద్ధమేనని, సరిపడా సంఖ్యలో ఎమ్మెల్యేలను కూడగట్టడానికి 3 రోజుల గడువు ఇవ్వాలని గవర్నర్ భగత్‌సింగ్‌ కోశ్యారీని శివసేన అభ్యర్థించింది. ఇందుకు ఆయన నిరాకరించారు.
ఆ తర్వాత కాసేపటికే మూడో అతిపెద్ద పార్టీ అయిన ఎన్‌సీపీని ఆహ్వానించారు. ఆ పార్టీకీ ఇవాళ రాత్రి 8.30 గంటల వరకు గడువు విధించారు. ఆ డెడ్లైన్ ముగియకముందే రాష్ట్రపతి పాలనకు సిఫార్సు చేయడం ప్రాధాన్యం సంతరించుకుంది.
తొలుత ప్రభుత్వ ఏర్పాటుకు భాజపాను ఆహ్వానించగా.. ఆ పార్టీ తాము అందుకు సిద్ధంగా లేమని గవర్నర్కు తెలిపింది.
కాంగ్రెస్ చర్చిస్తుండగానే....
మహారాష్ట్ర రాజకీయ పరిణామాలపై కాంగ్రెస్, ఎన్సీపీ మధ్య చర్చలు జరుగుతుండగానే... కేంద్రం రాష్ట్రపతి పాలనకు అంగీకారం తెలపడం గమనార్హం. ముంబయిలో ఎన్సీపీతో చర్చలు జరిపే బాధ్యతలను.. కాంగ్రెస్ అధ్యక్షురాలు సోనియా గాంధీ ముగ్గురు సీనియర్లకు అప్పగించారు. అహ్మద్ పటేల్, మల్లికార్జున్ ఖర్గే, కేసీ వేణుగోపాల్లు.. పవార్తో భేటీ కానున్నారు. అనంతరం.. ఈ రెండు పార్టీల మద్దతు వైఖరిపై ఓ స్పష్టత వచ్చే అవకాశముంది. అంతకుముందు సోనియా కూడా పవార్తో ఫోన్లో సంభాషించారు. ఇవాళ ఉదయం తన నివాసంలో కాంగ్రెస్ కోర్కమిటీ సభ్యులతోనూ ఈ అంశంపై చర్చించారు. ఈ పరిణామాల నడుమ శివసేన ఎన్సీపీ, కాంగ్రెస్ల మద్దతు కోసం ఎదురుచూస్తోంది.
