కర్ణాటక శివమొగ్గ దక్షిణ పశ్చిమ రైల్వేకు చెందిన.. అరసలు రైల్వే స్టేషన్ రూపురేఖలే మారిపోయాయి. దాదాపు రెండు దశాబ్దాల క్రితం... 'మాల్గుడి డేస్' రూపుదిద్దుకున్న ఆ స్టేషన్ ఇప్పుడు మళ్లీ.. అదే కళను సంతరించుకుంది.
మాల్గుడి రోజులే వేరు..
భారతీయ సంస్కృతీ సంప్రదాయాలు నవీకరణవైపు తొలి అడుగులు వేస్తున్న రోజులవి. ఆ నాటి పల్లె పరిస్థితులు.. పచ్చని పైర్లు.. కలుషితం కాని భాష.. ఆధునికం అమాయక ప్రజానికానికి మధ్య మగ్గిన ఓ గీతను అద్భుతంగా వర్ణించిన 'మాల్గుడి డేస్' పుస్తకాన్ని ఆర్.కే నారాయణ్ స్వాతంత్య్రానికి ముందే రచించారు. అయితే 1987 ప్రాంతంలో ఆ పుస్తకాన్ని టీవీ సీరియల్గా చిత్రీకరించి.. అనేక భాషల ప్రేక్షకుల హృదయాన్ని కదిలించేలా చేశారు దర్శకేంద్రుడు శంకర్ నాగ్.
అప్పుడే అడపాదడపా టీవీలు దర్శనిస్తున్న ఆ కాలంలో.. టీవీ ఉన్న చోటికే పిల్లా,పెద్దా చేరి దాదాపు 2006 వరకు 'మాల్గుడి డేస్'ను కళ్లార్పకుండా చూశారు. మాల్గుడి డేస్ మాధుర్యాన్ని చూసినవారెవరూ... ఆ దృశ్యాలను అంత తేలిగ్గా మరిచిపోలేరు. సీరియల్ మొదలయ్యే సమయానికి మోగే ఓ జానపద సంగీతం ఇప్పటికీ ప్రేక్షకుల హృదయాలను మీటుతూనే ఉంది. అందుకే, ఈ తరానికీ ఆ రోజులు కళ్లకు కట్టేలా అరసల రైల్వే స్టేషన్ను మార్చేశారు అధికారులు.
మళ్లీ మాల్గుడి కళ...
శివమొగ్గ జిల్లా కేంద్రానికి 34కిమీ దూరంలో, హొసనగర్ తాలూకా. అరసలు రైల్వే స్టేషన్ పచ్చని అటవీ ప్రాంతంలో.. అందంగా కనిపిస్తుంది. అందుకే మాల్గుడి డేస్కు ఇదే సరైన లొకేషన్ అయ్యింది. మాల్గుడి డేస్ సీరియల్ చిత్రీకరించిన అరసలు రైల్వే స్టేషన్లో ఆ స్మృతులతో.. ఓ మ్యూజియం నిర్మించాలనుకున్నారు స్థానిక ఎంపీ బీ. వై రాఘవేంద్ర. అందుకు తగిన అనుమతులు పొంది ఎట్టకేలకు నిర్మాణం పూర్తి చేశారు. తాజాగా ఆ రాష్ట్ర మంత్రి సురేశ్ అంగడి ఈ మ్యూజియంను ప్రారంభించారు.
మాల్గుడి థీమ్ రైల్వేస్టేషన్ ఇప్పుడు స్థానికుల హృదయాలను దోచుకుంటోంది. గజిబిజి జీవితాల్లో పచ్చని పల్లె వాతావరణంతో ప్రశాంతత చేకూర్చుతోంది. దీంతో భవిష్యత్తులో ఇది చక్కటి పర్యటక స్థలంగా మారుతుందని ఆశాభావం వ్యక్తం చేశారు ఎంపీ రాఘవేంద్ర.
ఇదీ చదవండి: ఆ 'అడవి రాణుల' కనుసన్నల్లోనే మృగరాజులు
