భారత వైమానిక దళానికి చెందిన మిగ్-29 యుద్ధ విమానం పంజాబ్లోని నవాంశహర్ జిల్లా ఛౌహర్పుర్ పరిధిలో కుప్పకూలింది. విమానంలో సాంకేతిక లోపం తలెత్తడమే ప్రమాదానికి కారణమని అధికారులు వెల్లడించారు. అయితే పైలట్ సురక్షితంగా బయటపడ్డాడు.
విమానం కూలిన వెంటనే ఆ ప్రాంతంలో పెద్ద ఎత్తున మంటలు ఎగసిపడ్డాయి. సమాచారం అందుకున్న అగ్నిమాపక సిబ్బంది, స్థానికులు సహాయకచర్యలు చేపట్టారు.
శిక్షణా కార్యక్రమంలో భాగంగా జలంధర్ సమీపంలోని వైమానిక స్థావరం నుంచి బయల్దేరిన కాసేపటికే విమానం కూలినట్లు వాయుసేన అధికారులు వెల్లడించారు. సాంకేతిక అవరోధంతో విమానం అదుపుతప్పిందని వారు తెలిపారు. హెలికాఫ్టర్ సాయంతోనే పైలట్ను రక్షించినట్లు పేర్కొన్నారు. ప్రమాదానికి గల కారణాలపై విచారణకు ఆదేశించినట్లు స్పష్టం చేశారు అధికారులు.
