ప్లాస్టిక్ వినియోగం ఎంత ప్రమాదకరమో మానవాళికి తెలుసు. అయినా సరే.. వాటిని ఉపయోగించడం మాత్రం మానరు. మానవ జాతికి పెనుముప్పుగా మారిన ప్లాస్టిక్ను నిషేధించాలంటూ ప్రపంచ దేశాలు ఆందోళన వ్యక్తం చేస్తున్న వేళ.. అసోంలో వినూత్న కార్యక్రమానికి శ్రీకారం చుట్టారు అధికారులు. వాడి పారేసిన నీళ్ల సీసాలను ఉపయోగించి.. ఏకంగా అంగన్వాడీ కేంద్రాన్నే నిర్మిస్తున్నారు.
ప్లాస్టిక్ ఇటుకలుగా మార్చి..
హైలాకాండీ నగరంలోని బరాక్ లోయలో ఓ అంగన్వాడీ కేంద్రాన్ని వినూత్న రీతిలో ఏర్పాటు చేయిస్తోంది జిల్లా యంత్రాంగం. వాడిపారేసిన ప్లాస్టిక్ సీసాలలో మట్టిని నింపి.. వాటిని ఇటుకలుగా ఉపయోగిస్తున్నారు. సాధారణ భవన నిర్మాణం లాగే.. తొలుత సిమెంట్, కంకరతో కూడిన పిల్లర్ను నిర్మించి.. గోడ కట్టడంలో ప్లాస్టిక్ బాటిళ్లను పేర్చుతున్నారు. మధ్య మధ్యలో మామూలుగానే సిమెంట్ వినియోగిస్తూ నిర్మిస్తోన్న ఈ ప్లాస్టిక్ సీసాల గోడలు చూడటానికి భలే అందంగా కనిపిస్తున్నాయి.
ఇదీ చదవండి: ఉపాధి కోసం 60 ఏళ్ల మహిళల 'సాగర సాహసాలు'
