ఎన్డీఏ నేతల ఇఫ్తార్ విందులపై కేంద్రమంత్రి గిరిరాజ్ సింగ్ ట్విట్టర్లో చేసిన వ్యాఖ్యలపై భాజపా అధ్యక్షుడు అమిత్షా ఆగ్రహించారు. వివాదస్పద వ్యాఖ్యలకు దూరంగా ఉండాలని మందలించారు. ఎన్డీఏ నేతలు నితీశ్ కుమార్, రామ్ విలాస్ పాసవాన్ ఇఫ్తార్ విందులో పాల్గొంటున్న చిత్రాలను ట్విట్టర్లో పోస్ట్ చేశారు గిరిరాజ్.
'ఇంతే ఆసక్తితో నవరాత్రి ఉత్సవాల్లో ఫలహారం స్వీకరిస్తే ఎంత చక్కటి చిత్రాలు వస్తాయి... మన ధర్మాలను పాటించేందుకు విముఖత వ్యక్తం చేసి, ఇతరులకు కనిపించటానికి ఎందుకు ముందుంటాం' అని తన ట్వీట్లో ప్రశ్నించారు.
బిహార్లో నితీశ్కుమార్ ప్రభుత్వంలో పనిచేసినప్పటి నుంచి ఆయనను వ్యతిరేకిస్తూ వస్తున్నారు గిరిరాజ్. తాను పోస్ట్ చేసిన నాలుగు ఫోటోల్లోనూ నితీశ్ ఉండటం చర్చనీయాంశంగా మారింది. గిరిరాజ్ పోస్ట్ చేసిన చిత్రాల్లో భాజపా నేత, బిహార్ ఉపముఖ్యమంత్రి సుశీల్ మోదీ సైతం కనిపిస్తున్నారు.
గిరిరాజ్ ట్వీట్కు ఎల్జేపీ నేత చిరాగ్ పాసవాన్ స్పందించారు. భారతీయ సంప్రదాయాలను గిరిరాజ్ ప్రశ్నిస్తున్నారని వ్యాఖ్యానించారు.
"సబ్కా సాథ్, సబ్కా వికాస్, సబ్కా విశ్వాస్ "మోదీ నినాదమని చిరాగ్ గుర్తు చేశారు.
నితీశ్కుమార్ కేంద్ర ప్రభుత్వ మంత్రివర్గంలో భాజపా ఇవ్వజూపిన ఒక మంత్రి పదవిని తిరస్కరించారు. బిహార్ తాజా మంత్రివర్గ విస్తరణలో ఎనిమిది మందికి మంత్రి పదవులు దక్కాయి. భాజపాకు నితీశ్ మంత్రివర్గంలో చోటుదక్కలేదు.
ఈ పరిణామాలు కొనసాగుతుండగానే గిరిరాజ్ రెండు పార్టీల మధ్య దూరం పెంచే వ్యాఖ్యలు చేశారు. ఈ నేపథ్యంలోనే దిద్దుబాటు చర్యలకు దిగారు అమిత్షా.
