ఝార్ఖండ్లో జేఎంఎం నేతృత్వంలో ప్రభుత్వాన్ని ఏర్పాటు ఖాయమని కాంగ్రెస్ పార్టీ స్పష్టం చేసింది. ఆధిక్యం వైపు దూసుకెళ్తోన్న కూటమి ఏర్పాటు చేసే ప్రభుత్వంలో ముఖ్యమంత్రిగా హేమంత్ సోరెన్ ఉంటారని చెప్పింది.
ఈ మేరకు ఝార్ఖండ్ ఏఐసీసీ ఇన్ఛార్జి ఆర్పీఎన్ సింగ్ ప్రకటన చేశారు.
"ప్రజల సమస్యలను లేవనెత్తుతూ ఎన్నికల్లో పోరాడాం. మేం ప్రభుత్వాన్ని ఏర్పాటు చేస్తాం. సమస్యల నుంచి ప్రజల దృష్టిని మరల్చేందుకు మోదీ-షా ద్వయం ప్రయత్నించింది. కానీ ప్రజలు ఆ మాయలో పడలేదు."
-ఆర్పీఎన్ సింగ్, ఝార్ఖండ్ ఏఐసీసీ ఇన్ఛార్జి
ఈ ఫలితాలతో భాజపా అవినీతి, ఆ పార్టీ గర్వం ఓడిపోయాయని రాష్ట్ర కాంగ్రెస్ సమన్వయ కర్త అజయ్ శర్మ అభిప్రాయపడ్డారు.
"భాజపా అవినీతిపరులకు టికెట్లు ఇచ్చింది. ప్రజలు వారిని తిరస్కరించారు. ప్రజల సమస్యలపై కాంగ్రెస్ దృష్టి పెట్టింది. సామాన్యుడి సమస్యలు తీర్చడంలో భాజపా విఫలమైందని నిరూపించగలిగాం."
-అజయ్ శర్మ, రాష్ట్ర కాంగ్రెస్ సమన్వయ కర్త
ఎన్నికల సంఘం విడుదల చేసిన ఫలితాల ప్రకారం.. ప్రస్తుతం జేఎంఎం నేతృత్వంలోని కూటమి 42 స్థానాల్లో ఆధిక్యంలో కొనసాగుతోంది. భాజపా 28 స్థానాల్లో ముందంజలో ఉంది.
