బిహార్లో నెలకొన్న తాజా పరిణామాలపై కేంద్రమంత్రి, ఎల్జేపీ అధినేత రామ్విలాస్ పాసవాన్ స్పందించారు. రాష్ట్రంలో ఎన్డీఏ కూటమికి ఎలాంటి ఇబ్బందులు లేవని పేర్కొన్నారు. కూటమికి ముఖ్యమంత్రి నితీశ్ కుమారే నాయకుడని స్పష్టం చేశారు.
"ఎన్డీఏలో ఇబ్బందులు లేవు. నితీశ్ కుమార్ మా నాయకుడు. దీనిపై ఎక్కువ ఆలోచనలు అనవసరం. ఎన్డీఏ కూటమితోనే ఉంటామని ఆయనే (నితీశ్ కుమార్) చెప్పారు. అంతేకాక బంధాన్ని బలోపేతం చేయడానికి నేను ఉన్నాను. ఆయన సొంతంగా నిర్ణయాలు తీసుకునేంత శక్తిమంతమైన నాయకుడు. ఎన్డీఏతోనే ఉంటామని స్పష్టంగా చెప్పినప్పుడు సమస్య ఎక్కడుంది?"
- రామ్ విలాస్ పాసవాన్, కేంద్ర మంత్రి.
బిహార్లో మంత్రివర్గాన్ని ఆదివారం విస్తరించారు ఆ రాష్ట్ర ముఖ్యమంత్రి నితీశ్ కుమార్. జేడీయూకి చెందిన 8 మందితో మంత్రులుగా ప్రమాణ స్వీకారం చేయించారు. మిత్రపక్షమైన భాజపాకు మంత్రివర్గంలో చోటిచ్చినా... ఆ పార్టీ నేతలు చేరలేదు. అయితే... కమలదళంతో ఎలాంటి విభేదాలు లేవని ప్రకటించారు నితీశ్.
