బంగాల్ కోల్కతాలో నేడు కేంద్ర హోంమంత్రి అమిత్ షా పర్యటించనున్నారు. కోల్కతా వేదికగా వివాదాస్పద జాతీయ పౌర జాబితా చట్ట సవరణ-2019పై సెమినార్ నిర్వహించనున్నారు. అసోం తరహాలో బంగాల్లోనూ ఎన్ఆర్సీని చేపడతామన్న ప్రకటనల నేపథ్యంలో షా సెమినార్పైనే అందరి దృష్టి కేంద్రీకృతమైంది. సెమినార్లో ఏం చెప్పబోతున్నారు. ఏదైనా ప్రకటన ఉంటుందా అనే విషయంపై సర్వత్రా చర్చ నడుస్తోంది.
కేంద్ర హోంమంత్రిగా పదవీ బాధ్యతలు చేపట్టిన అనంతరం తొలిసారి బంగాల్లో పర్యటిస్తున్నారు షా. ముందుగా కోల్కతాలోని ఓ కమ్యూనిటీ నిర్వహిస్తోన్న దుర్గా పూజలో పాల్గొననున్నారు. అనంతరం సెమినార్కు హాజరవుతారు.
ఇటీవల అసోంలో విడుదలైన ఎన్ఆర్సీ తుది జాబితాలో సుమారు 19 లక్షల మందికి చోటు లభించలేదు. అందులో హిందూ బెంగాలీలు అధికంగా ఉండటం వల్ల రాష్ట్ర ప్రజల్లో భయాందోళనలు నెలకొన్నాయి. ఈ భయంతోనే బంగాల్లో ఇప్పటి వరకు సుమారు 11 మంది మరణించారు. ఈ నేపథ్యంలో షా సెమినార్ నిర్వహిస్తుండటం ప్రాధాన్యం సంతరించుకుంది.
ఎన్ఆర్సీపై టీఎంసీ పార్టీ సృష్టించిన దురాభిప్రాయాన్ని అమిత్ షా సెమినార్ తొలగిస్తుందని భాజపా వర్గాలు పేర్కొన్నాయి.
"ఎన్ఆర్సీపై రాష్ట్రంలో భయాన్ని సృష్టించింది తృణమూల్ కాంగ్రెస్. ఈ సమస్యపై నెలకొన్న అన్ని రకాల దురాభిప్రాయాలు, భయాలను పోగొట్టేందుకు అమిత్ షా పూర్తి స్థాయిలో వివరించనున్నారు. బంగాల్లో ఓటు బ్యాంకుగా చూస్తోన్న బంగ్లాదేశీ ముస్లిం చొరబాటుదారులను కాపాడేందుకే టీఎంసీ ఎన్ఆర్సీని వ్యతిరేకిస్తోంది."
-భాజపా రాష్ట్ర సీనియర్ నేత.
ప్రజల ఏర్పాట్లు..
బంగాల్లో ఎన్ఆర్సీని చేపడతామని కేంద్ర హోంమంత్రి అమిత్ షా పలు సందర్భాల్లో పేర్కొన్నారు. కానీ రాష్ట్ర ముఖ్యమంత్రి, తృణమూల్ అధినేత్రి మమత బెనర్జీ ఎన్ఆర్సీని రాష్ట్రంలో అనుమతించబోమని స్పష్టం చేశారు. కానీ రాష్ట్రంలో ఎన్ఆర్సీ చేపడతారనే ప్రకటనతో ఇప్పటికే అక్కడి ప్రజలు ముమ్మర ఏర్పాట్లు చేసుకుంటున్నారు. ప్రభుత్వ కార్యాలయాలు, మున్సిపల్ ఆఫీసులకు పెద్ద ఎత్తున చేరుకుని జనన ధ్రువీకరణ సహా అవసరమైన పత్రాలను తీసుకుంటున్నారు.
అసోం ఎన్ఆర్సీపై...
ఎన్ఆర్సీ పునరుద్ధరణను మొదటి నుంచి వ్యతిరేకిస్తోంది టీఎంసీ. భాజపాను బెంగాలీ వ్యతిరేకిగా పేర్కొంది. అసోం ఎన్ఆర్సీ నుంచి పెద్ద సంఖ్యలో హిందువులకు చోటు లభించకపోవటం పై అమిత్ షా, భాజపా నాయకత్వం స్పష్టతనివ్వాలని డిమాండ్ చేశారు టీఎంసీ ప్రధాన కార్యదర్శి పార్థ ఛటర్జీ.
ఇదీ చూడండి: ప్రపంచానికి సరికొత్త దిశానిర్దేశాలుగా గాంధీ సిద్ధాంతాలు
