ఎయిరిండియాకు చెందిన 75 విమానాల ద్వారా అమెరికా, కెనడా దేశాలకు ప్రయాణికులను తరలిస్తున్నట్లు ఆ సంస్థ ప్రకటించింది. 'వందే భారత్ మిషన్'లో భాగంగా ఈ నెల 9 నుంచి 30 వరకు ఈ ప్రాజెక్ట్ చేపట్టనున్నట్లు తెలిపింది.
ఈ నెల 5న సాయంత్రం 5 నుంచి..
అమెరికా, కెనడా దేశాలకు వెళ్లాలనుకున్నవారు.. విమాన సేవల నిబంధనలకు అనుగుణంగా తమ పేర్లను నమోదు చేసుకోవాలని సూచించింది కేంద్రం. ఇందుకోసం ఎయిరిండియా వెబ్సైట్లో.. ఈ నెల 5న సాయంత్రం 5 గంటలకు బుకింగ్స్ ప్రారంభం కానున్నాయి. ఇప్పటికే కొన్ని విదేశీ విమానయాన సంస్థలు ఈ ప్రక్రియను చేపట్టగా.. మరికొన్ని సంస్థలూ అదే బాటలో నడవనున్నాయి.
విదేశీయులకూ అనుమతి
అయితే ఈ ఫ్లైట్స్ ద్వారా విదేశీ ప్రయాణికులకు కూడా అనుమతినిస్తున్నట్లు కేంద్ర పౌర విమానయాన శాఖమంత్రి హర్దీప్ సింగ్ పూరి తెలిపారు. గతంలో నిర్దేశించిన విధంగా 75 విమానాలు.. న్యూయార్క్, నెవార్క్, చికాగో, వాషింగ్టన్, శాన్ఫ్రాన్సిస్కో, వాంకౌవర్, టొరంటో వంటి ప్రముఖ ప్రాంతాలను వెళ్లనున్నట్లు మంత్రి పేర్కొన్నారు.
కరోనా నేపథ్యంలో సుమారు రెండు నెలల లాక్డౌన్ అనంతరం.. మే 25 నుంచి దేశీయ విమానయాన సర్వీసులు పునఃప్రారంభమయ్యాయి.
ఇదే తొలిసారి
విదేశాల్లో చిక్కుకున్న భారతీయుల కోసం 'వందేభారత్ మిషన్'ను చేపట్టింది కేంద్ర ప్రభుత్వం. ఈ ప్రక్రియ మే 7 న ప్రారంభమైంది. అయితే మిషన్లో భాగంగా విదేశాలకు తరలించడం ఇదే తొలిసారి.
ఇదీ చదవండి: నేడో, రేపో భారత్కు మాల్యా.. నేరుగా కోర్టుకే!
