పశ్చిమ్ బంగలో ఉద్రిక్త పరిస్థితుల్ని సద్దుమణిగేలా చేసేందుకు జూనియర్ డాక్టర్లను చర్చలకు ఆహ్వానించారు ముఖ్యమంత్రి మమతా బెనర్జీ. కానీ వారు మమత ఆహ్వానాన్ని తిరస్కరించారు. ఇది తమ ఐక్యత, నిరసనల విచ్ఛిన్నానికి చేస్తోన్న చర్యగా అభివర్ణించారు.
శనివారం సాయంత్రం వరకు గడువు
రాష్ట్ర సచివాలయంలో చర్చలకు రావాలని మమతాబెనర్జీ ఆహ్వానించినట్లు సమ్మెలో భాగంకాని సీనియర్ డాక్టర్ సుకుమార్ ముఖర్జీ తెలిపారు. శనివారం సాయంత్రం వరకు గడువు ఇచ్చారని పేర్కొన్నారు. ముఖర్జీతో పాటు మరికొంత మంది ముఖ్యమంత్రిని కలిసి సుమారు రెండున్నర గంటల పాటు చర్చలు జరిపారు. నలుగురు జూడాలను చర్చలకు ఆహ్వానించాలని వైద్య విద్య సంచాలకులు ప్రదీప్ మిత్రాను కోరారు ముఖర్జీ.
చర్చలకు వచ్చేది లేదు..
రాష్ట్ర ప్రభుత్వ ఆహ్వానాన్ని తిరస్కరించారు జూనియర్ డాక్టర్లు. ఇది తమలోని ఐక్యత, నిరసనలను విచ్ఛిన్నం చేసేందుకు చేసే చర్యకు పేర్కొన్నారు. సచివాలయంలో ఎలాంటి సమావేశానికి హాజరయ్యేది లేదని తేల్చిచెప్పారు. ఎన్ఆర్ఎస్ వైద్య కళాశాల వద్దకు ముఖ్యమంత్రి వచ్చి భేషరతుగా క్షమాపణలు చెప్పాలని డిమాండ్ చేశారు.
ముఖ్యమంత్రి నుంచి స్పందన లేదు: గవర్నర్
జూనియర్ డాక్టర్ల ఆందోళనలపై చర్చలకు... ముఖ్యమంత్రి మమతా బెనర్జీని సంప్రదించేందుకు ప్రయత్నించినా ఆమె నుంచి ఎలాంటి స్పందన లేదని తెలిపారు రాష్ట్ర గవర్నర్ కేసరి నాథ్ త్రిపాఠీ. ఒకవేళ మమత ఫోన్ చేసినట్లయితే ఈ విషయంపై చర్చిస్తామని తెలిపారు.
దాడిలో గాయపడిన డాక్టర్ ముఖోపాధ్యాయ్ని ఆసుపత్రికి వెళ్లి పరామర్శించారు గవర్నర్.
గవర్నర్ను కలిసిన భాజపా బృందం
హోం, వైద్య శాఖల బాధ్యతల నుంచి మమతా బెనర్జీ తప్పుకోవాలని డిమాండ్ చేశారు రాష్ట్ర భాజపా నాయకులు. రాష్ట్ర పరిస్థితులను చక్కదిద్దేందుకు జోక్యం చేసుకోవాలని కోరుతూ.. రాష్ట్ర గవర్నర్ త్రిపాఠీని కలిశారు. ఈ అంశంపై ముఖ్యమంత్రితో మాట్లాడాలని కోరారు.
ఇదీ చూడండి: టార్గెట్ దీదీ: 100 మందికి పైగా వైద్యుల రాజీనామా
