లోక్సభలో భారీ ఆధిక్యం భాజపా సొంతం. కానీ రాజ్యసభలో సరిపడ సంఖ్యా బలం లేదు. అందుకే ఎన్నో కీలక బిల్లులు ఇంకా ఎగువసభ దాటలేకపోతున్నాయి. అయితే మోదీ నేతృత్వంలోని ఎన్డీఏ ప్రభుత్వం త్వరలోనే ఈ సమస్యను అధిగమించే అవకాశాలున్నాయి.
జులై 5 తర్వాత...
రాజ్యసభలో మొత్తం సీట్లు 245. ఓ పార్టీ సాధారణ మెజారిటీ పొందాలంటే కావల్సిన సీట్లు 123. ఇటీవలే తెదేపా రాజ్యసభ సభ్యులు నలుగురు భాజపాలో చేరారు. దీనివల్ల ఎగువసభలో భాజపా బలం 74కు చేరింది. జులై 5న సభలోని 6 సీట్లకు ఎన్నికలు జరగనున్నాయి. వాటిలోని నాలుగింట్లో కాషాయ దళం గెలుపు సునాయాసం.
ఎన్డీఏ భాగస్వామ్యపక్షాలను కలిపితే 109 మంది సభ్యులు అధికార పక్షం తరఫున ఉన్నారు. స్వతంత్రులు, నామినేటెడ్ సభ్యులు ఎలాగూ అధికార పార్టీకే మద్దతిస్తారు.
బీజేడీ, తెరాస, వైకాపాలకు 13 మంది రాజ్యసభ ఎంపీలున్నారు. ఇవి ప్రతిపక్షాలే అయినా భాజపాకు వ్యతిరేకమేమీ కాదు. కమలదళంతో ఆ పార్టీలకు స్నేహపూర్వక సంబంధాలున్నాయి. ఈ గణాంకాలు చూస్తే ఎగువసభలోనూ ఎన్డీఏ పట్టు సాధించే అవకాశాలున్నాయని స్పష్టమవుతోంది.
ఇదీ చూడండి: 'గాంధీలు కాని ప్రధానులపై కాంగ్రెస్ చిన్నచూపు'
