కాంగ్రెస్ అధ్యక్షుడు రాహుల్ గాంధీ మరోసారి ప్రధాని నరేంద్ర మోదీపై విమర్శల వర్షం కురిపించారు. సొంత నియోజకవర్గం అమేఠీలోని తిలోయిలో.. బహిరంగ సభలో పాల్గొన్నారు రాహుల్. మోదీ ఐదేళ్ల పాటు బడా వ్యాపారులకే చౌకీదార్గా వ్యవహరించారని ఆరోపించారు. పేదల ఇళ్ల బయట చౌకీదార్ని ఎప్పుడైనా చుశారా అని ప్రశ్నించారు.
కాంగ్రెస్ ప్రభుత్వం అధికారంలోకి వస్తే రఫేల్ వ్యవహారం అంతు తేలుస్తామని రాహుల్ గాంధీ పేర్కొన్నారు.
"ఐదేళ్లలో చౌకీదార్... అనిల్ అంబానీ, మెహుల్ చోక్సీ, నీరవ్ మోదీ లాంటి దొంగలకు కాపలాదారుగా వ్యవహరించారు. మీ డబ్బు దొంగిలించి, మీ జేబులోంచి డబ్బులు లాక్కుని అనిల్ అంబానీ లాంటి వారి జేబులో పెట్టారు. నరేంద్ర మోదీ భారత ప్రజల నుంచి మాత్రమే దొంగిలించలేదు. సోదర సోదరీమణులారా... అధికమొత్తంగా మీ దగ్గర నుంచి దొంగిలించారు. ఈ చౌకీదార్ దేశమంతా తిరిగి చెప్తున్నారు.. సర్కారు వద్ద డబ్బులు లేవని. ఎందుకంటే చౌకీదార్ చోర్ హై. రఫేల్ కుంభకోణం బయటపడుతుంది. అంబానీ, మోదీ పట్టుబడతారు. ఇప్పుడు ఈ చౌకీదార్ అంటారు... మేమంతా చౌకీదార్లమేనని. దేశమంతా చౌకీదార్లేనని. 30 వేల కోట్లు అనిల్ అంబానీకి ఎందుకు ఇచ్చారో అడగండి. ఇందుకు ప్రతిగా మోదీకి ఆయన ఏం చేశారో కూడా అడగండి. మా ప్రభుత్వం రాగానే రఫేల్పై విచారణ జరుగుతుంది మోదీజీ. ఇది మరవొద్దండీ. అప్పుడు నిజం బయటకు వస్తుంది." - రాహుల్ గాంధీ, కాంగ్రెస్ అధ్యక్షుడు
- ఇదీ చూడండి: రాహుల్కు ఊరట- అమేఠీ నామినేషన్కు ఓకే
