మహారాష్ట్రలో ఉద్ధవ్‌ ఠాక్రే నేతృత్వంలో కొలువుదీరిన కొత్త ప్రభుత్వంలో నేషనలిస్ట్‌ కాంగ్రెస్ పార్టీ(ఎన్సీపీ)కి కీలకపదవులు దక్కనున్నట్లు తెలుస్తోంది. గరిష్ఠంగా 43 మందిని మంత్రులుగా నియమించే అవకాశం ఉండగా....అందులో ఆ పార్టీకి 16 పదవులు దక్కనున్నట్లు సమాచారం. శివసేనకు 15, కాంగ్రెస్కు 12 మంత్రి పదవులు ఇవ్వనున్నట్లు తెలుస్తోంది. కాంగ్రెస్కు స్పీకర్ పదవి కేటాయించినందున ఆ పార్టీకి పరిమిత సంఖ్యలోనే మంత్రి పదవులు దక్కనున్నట్లు విశ్వసనీయవర్గాల సమాచారం.
ఉద్ధవ్‌తోపాటు మూడు పార్టీల నుంచి మంత్రులుగా ఆరుగురు ప్రమాణం చేశారు. ఎన్సీపీ నుంచి జయంత్ పాటిల్‌, ఛగన్‌ భుజ్‌బల్‌, కాంగ్రెస్ నుంచి బాలాసాహెబ్‌ థోరట్‌, నితిన్‌ రౌత్‌, శివసేన నుంచి ఏక్‌నాథ్‌ షిండే, సుభాష్‌ రాజారాం దేశాయ్‌ మంత్రులుగా ప్రమాణం చేశారు.
జయంత్కు హోంశాఖ!
ఎన్సీపీ నేత జయంత్ పాటిల్‌కు కీలకమైన హోంశాఖ కేటాయించనున్నట్లు తెలుస్తోంది. కాంగ్రెస్-ఎన్సీపీ హయాంలోనూ ఆయన అదే శాఖ నిర్వహించారు. ఎన్సీపీకి ఉప ముఖ్యమంత్రి పదవి కూడా దక్కనుండగా......అజిత్‌ పవార్‌కు ఈ పదవిని కేటాయించనున్నట్లు ప్రచారం జరుగుతోంది. కాంగ్రెస్ పార్టీకి రెవెన్యూ శాఖ దక్కనుండగా... అశోక్‌ చవాన్‌ లేదా బాలాసాహెబ్‌ థోరట్‌కు ఈ పదవి కేటాయించే అవకాశం ఉంది.
ఉద్ధవ్‌తోపాటు మంత్రులుగా ప్రమాణం చేసిన ఏక్‌నాథ్‌ షిండే, సుభాష్‌ దేశాయ్‌.....ఫడణవీస్‌ ప్రభుత్వంలో కేబినెట్‌ మంత్రులుగా పనిచేశారు. వారికి ఏ శాఖలు కేటాయిస్తారనేది ఆసక్తిగా మారింది.
