ఉత్తర్ప్రదేశ్ సోన్‌భద్రలో భూవివాద కాల్పుల బాధిత కుటుంబాలను ఆ రాష్ట్ర ముఖ్యమంత్రి యోగి ఆదిత్యనాథ్ పరామర్శించారు. మృతుల కుటుంబాలు, క్షతగాత్రులకు ప్రభుత్వం అండగా ఉంటుందని భరోసా ఇచ్చారు. ఈ నెల 15న ఇరువర్గాల మధ్య జరిగిన ఘర్షణలో గాయపడిన వారి ఆరోగ్య పరిస్ధితిని అడిగి తెలుసుకున్నారు. మృతి చెందిన 10 మంది కుటుంబాలతో పాటు ఇతర బాధితులను ఉద్దేశించి ప్రసంగించిన యోగి.. ప్రజలంతా ప్రశాంతంగా ఉండాలని విజ్ఞప్తి చేశారు.
కాంగ్రెస్ పోరాటంతోనే...
బాధిత కుటుంబాలను సీఎం పరామర్శించడాన్ని కాంగ్రెస్ ప్రధాన కార్యదర్శి ప్రియాంక గాంధీ స్వాగతించారు. బాధితుల పక్షాన వేలాది మంది కాంగ్రెస్ కార్యకర్తలు పోరాడిన తర్వాతే ఉత్తరప్రదేశ్ ప్రభుత్వం చర్యలు తీసుకుంటోందని ఎద్దేవా చేశారు. బాధితులకు అండగా నిలవటం ప్రభుత్వ బాధ్యతని ట్వీట్ చేశారు ప్రియాంక.
" ఉంభా గ్రామ ప్రజలు న్యాయం కోసం చాలా కాలంగా ఎదురుచూస్తున్నారు. వారి 5 డిమాండ్లను ప్రభుత్వం నెరవేరుస్తుందని ఆశిస్తున్నా. బాధితులకు ఈ రోజు ఇచ్చిన హామీలను వీలైనంత త్వరగా పూర్తి చేయాలి."
- ప్రియాంక గాంధీ, కాంగ్రెస్ ప్రధాన కార్యదర్శి
