ప్రధాన మంత్రి నరేంద్ర మోదీ వ్యక్తిగత వెబ్‌సైట్కు చెందిన ట్విట్టర్ ఖాతా హ్యాక్ అయినట్లు ఆ సంస్థ అంగీకరించింది. క్రిప్టోకరెన్సీ ద్వారా పీఎం సహాయనిధికి సాయం చేయాలంటూ ఈ ఖాతా నుంచి వరుస ట్వీట్లు వచ్చాయి. వెంటనే అప్రమత్తమైన ట్విట్టర్.. ఆ ట్వీట్లను తొలగించినట్లు స్పష్టం చేసింది.
"ఈ హ్యాకింగ్‌ను మేం నిర్ధరించుకున్నాం. వెంటనే భద్రత చర్యలకు ఉపక్రమించాం. హ్యాకర్ చేసిన ట్వీట్లను తొలగించాం. అయితే, అదనంగా ఎవరెవరి ఖాతాలు హ్యాక్ అయ్యాయో ఇప్పుడే అంచనా వేయలేం. ఇలాంటివి జరగకుండా ఉండేందుకు చర్యలు తీసుకుంటున్నాం."
- ట్విట్టర్ ప్రకటన
మోదీ వెబ్సైట్ ట్విట్టర్ ఖాతాకు 25 లక్షల మంది ఫాలోవర్లు ఉన్నారు. అమెరికా మాజీ ఉపాధ్యక్షుడు జో బైడెన్, టెస్లా వ్యవస్థాపకుడు ఎలాన్ మస్క్ తర్వాత జరిగిన హై ప్రొఫైల్ ట్విట్టర్ అకౌంట్ హ్యాక్ ఇదే. జులై 15న జరిగిన ఈ హ్యాకింగ్లో ట్విట్టర్ ఉద్యోగుల నుంచి మోసపూరితంగా వివరాలను పొందినట్లు సంస్థ గుర్తించింది.
అయితే, మోదీ ఖాతా హ్యాకింగ్ గతంలో మాదిరిగా ఉద్యోగుల పొరపాటు వల్ల జరిగినట్లు ఆధారాలు లేవని ట్విట్టర్ వెల్లడించింది.
మోదీ ఖాతాను హ్యాక్ చేసిన సైబర్ నేరగాడు.. కొవిడ్ నేపథ్యంలో క్రిప్టో కరెన్సీ ద్వారా పీఎం సహాయ నిధికి విరాళం అందించాలని వరుస ట్వీట్లు చేశాడు. అందులో క్రిప్టో కరెన్సీ ఖాతా నంబరు కూడా జత చేశాడు.
ఇదీ చూడండి: ప్రముఖుల ట్విట్టర్ ఖాతాలను ఎలా హ్యాక్ చేశారంటే?
