జమ్ముకశ్మీర్లోని ఓ గ్రామంలో నేలపై పడి ఉన్న ఓ డ్రోన్ కలకలం సృష్టించింది. తొలుత ఆ డ్రోన్.. పాకిస్థాన్ నుంచి అంతర్జాతీయ సరిహద్దు ద్వారా జమ్ములోకి ప్రవేశించిందని పోలీసులు భావించారు. కానీ అది భారత సైన్యానికి చెందిందని.. బ్యాటరీ అయిపోవడం వల్ల నేలపై పడిపోయిందని తెలుసుకుని ఊపిరి పీల్చుకున్నారు.
ఇదీ జరిగింది...
ఫల్లియన్ మండలంలోని భూతియా చక్ వద్ద ఓ డ్రోన్ను స్థానికులు గుర్తించారు. వెంటనే పోలీసులకు సమాచారం అందించారు. డ్రోన్ల సహాయంతో ఆయుధాలు, డ్రగ్స్ను అక్రమంగా రవాణా చేయడానికి పాకిస్థాన్ ప్రయత్నిస్తున్న నేపథ్యంలో.. అధికారులు వెంటనే అప్రమత్తమయ్యారు. ఘటనాస్థలానికి పరుగులు పెట్టారు. డ్రోన్ను స్వాధీనం చేసుకున్నారు.
దర్యాప్తు అనంతరం ఆ డ్రోన్ భారత సైన్యానికి చెందినదని నిర్ధరించుకున్నారు జమ్ము పోలీసులు. రోజువారీ కార్యకలాపాల్లో భాగంగా డ్రోన్ను పరీక్షిస్తున్న సమయంలో దాని బ్యాటరీ అయిపోయిందని.. ఫలితంగా ఆ గ్రామంలో పడిందని అధికారులు వెల్లడించారు.
ఇదీ చూడండి:- జమ్ములో ఆర్మీ చీఫ్ పర్యటన- భద్రతపై సమీక్ష
