హౌడీ మోదీ ఎందుకింత ప్రత్యేకమంటే..!

అమెరికా హ్యూస్టన్​లో ఆదివారం రాత్రి 8.30 నుంచి 11.30 గంటల వరకు (భారతీయ కాలమానం ప్రకారం) 'హౌడీ మోదీ' కార్యక్రమం జరగనుంది. ఎన్​ఆర్​జీ స్టేడియంలో జరుగనున్న ఈ ఆత్మీయ భేటీలో ప్రధాని నరేంద్ర మోదీ ప్రవాస భారతీయులను ఉద్దేశించి ప్రసంగిస్తారు. పోప్​ తరువాత.. అమెరికాలో పర్యటిస్తున్న ఓ విదేశీ నాయకుడి కోసం ఇంత పెద్ద సభ నిర్వహిస్తుండడం ఇదే మొదటిసారి.

అమెరికా పర్యటనలో ఉన్న ప్రధాని నరేంద్ర మోదీ.. ఆదివారం హ్యూస్టన్​లోని ఎన్​ఆర్​జీ స్టేడియంలో జరిగే 'హౌడీ మోదీ' కార్యక్రమంలో పాల్గొంటారు. ఈ ఆత్మీయ భేటీలో ప్రవాస భారతీయులను ఉద్దేశించి ప్రసంగిస్తారు.

హౌడీ మోదీ కార్యక్రమ వివరాలు

⦁ అమెరికా హ్యూస్టన్​లో ఆదివారం రాత్రి 8.30 నుంచి 11.30 గంటల వరకు (భారతీయ కాలమానం ప్రకారం) హౌడీ మోదీ కార్యక్రమం జరుగుతుంది.
⦁ 'ది ఇండియన్​-అమెరికన్​ స్టోరీ' అనే సాంస్కృతిక కార్యక్రమంతో హౌడీ మోదీ ప్రారంభమవుతుంది. అమెరికా సంస్కృతి, మేధో, సామాజిక రంగాలకు భారతీయ అమెరికన్లు చేస్తున్న కృషిని ఇది వివరిస్తుంది.
⦁ 90 నిమిషాల ఈ సాంస్కృతిక ప్రదర్శనలో అమెరికా, టెక్సాస్​లకు చెందిన 27 బృందాలు ప్రదర్శనలు ఇస్తాయి. భారతీయ-అమెరికన్​ యువత గురించి 2 పాటలు ప్రదర్శిస్తారు.

'షేర్డ్​ డ్రీమ్స్​-బ్రైట్​ ఫ్యూచర్​'

⦁ హౌడీ మోదీ కార్యక్రమంలో అమెరికా అధ్యక్షుడు డొనాల్డ్​ ట్రంప్ కూడా పాల్గొంటారు.
⦁ మొదటిసారిగా మోదీతో కలిసి సుమారు 50 వేల భారతీయ-అమెరికన్​లను ఉద్దేశించి ప్రసంగిస్తారు.
⦁ 'షేర్డ్​ డ్రీమ్స్​-బ్రైట్ ఫ్యూచర్​' ద్వారా భారత్​-అమెరికా ద్వైపాక్షిక సంబంధాల బలోపేతం చేయడానికి కృషి చేయనున్నారు.

మోదీ ప్రసంగం

⦁ ప్రవాస భారతీయులు సాంస్కృతికంగా, మేధోపరంగా అమెరికాకు చేస్తున్న సేవలను ప్రస్తుతిస్తారు. ప్రేక్షకుల సౌలభ్యం కోసం మోదీ ప్రసంగానికి ఆంగ్ల అనువాదం అప్పటికప్పుడే స్మార్ట్​ఫోన్​ల ద్వారా అందిస్తారు. భారత్​- అమెరికా ద్వైపాక్షిక బంధాల పురోభివృద్ధిపై జరగాల్సిన కృషిని గురించి ప్రసంగిస్తారు.

వర్ష సూచన

• హౌడీ మోదీ కార్యక్రమానికి వర్షం భంగం కలిగించే అవకాశముందని స్థానిక వాతావరణ విభాగం పేర్కొంది.

ఇదీ చూడండి: ప్రధాని మోదీ అగ్రరాజ్య పర్యటన సాగనుందిలా..