దేశంలో లాక్డౌన్ విధించినప్పటి నుంచి రవాణా వ్యవస్థ ఎక్కడికక్కడ పూర్తిగా స్తంభించిపోయింది. అన్ని సంస్థలు, ఫ్యాక్టరీలు మూసేయడం వల్ల చాలా మంది ఉద్యోగాలు కోల్పోయి.. నిరాశతో స్వస్థలాలకు చేరుకునే ప్రయత్నం చేస్తున్నారు. ఇలానే ఉపాధి కోల్పోయిన ఓ యువకుడు ఎలాగైనా తన ఇంటికి వెళ్లాలనుకున్నాడు. వెంటనే సైకిల్ తీసి ప్రయాణాన్ని మొదలు పెట్టి, ఏకంగా 1,800 కిలోమీటర్లు తొక్కుకుంటూ గమ్యాన్ని చేరుకున్నాడు.
అసలేమైంది?
మహేశ్ జెన అనే యువకుడు మహారాష్ట్రలో వలసకూలీగా పనిచేస్తున్నాడు. దేశవ్యాప్తంగా లాక్డౌన్ ప్రకటించడం వల్ల యువకుడు పని చేస్తోన్న ఫ్యాక్టరిని ఐదు నెలల పాటు మూసేశారు. పని లేకుండా జీవనం సాగించడం కష్టమని భావించి రెండు నెలల క్రితం కొన్న సైకిల్పై తన ఊరికి వెళ్లాలని నిర్ణయించుకున్నాడు మహేశ్.
అలా 8 రోజుల్లో మహారాష్ట్ర నుంచి 1800 కిలోమీటర్లు ప్రయాణించి ఒడిశాలోని జైపుర్కు చేరుకున్నాడు. రెండు మూడు చోట్ల పోలీసులు ఆపినప్పటికీ.. యువకుడి పరిస్థితిని చూసి అనుమతించారు. మధ్యమధ్యలో ఆలయాలు, రోడ్ల పక్కన విశ్రాంతి తీసుకుంటూ, ఎన్జీఓ సంస్థలు అందించిన ఆహారంతో ఆకలి తీర్చుకున్నాడు.
జైపుర్ చేరుకున్న తర్వాత అక్కడి అధికారులు యువకుడికి ప్రాథమిక చికిత్స కోసం క్వారంటైన్ కేంద్రానికి పంపించారు. 14 రోజుల పర్యవేక్షణ అనంతరం ఇంటికి అనుమతిస్తామని అధికారులు తెలిపారు.
