వార్తా ఛానళ్లకు సంబంధించి ఆసక్తికర విషయాలు వెల్లడించింది ఓ సర్వే. దేశంలో నాలుగింట మూడొంతుల మంది వార్తా ఛానళ్లను వినోదాత్మకమైనవిగా భావిస్తున్నారని తెలిపింది.
"భారత్లో వార్తా ఛానళ్లలో న్యూస్ కన్నా వినోదమే ఎక్కువా?" అని అడిగిన ప్రశ్నకు 73.9 శాతం మంది అవునని సమాధానమిచ్చారు. 22.5 శాతం మంది కాదని, మరో 2.6 శాతం తెలియదని చెప్పారు.
- లింగ పరంగా చూస్తే 75.1 శాతం మంది పురుషులు.. 72.7 శాతం మంది మహిళలు అంగీకరించారు.
- వయసు వారీగా చూస్తే 55 ఏళ్లలోపు వారు 70 శాతం మంది, 55 ఏళ్లకు పైబడిన వారు 68.7 శాతం వార్తా ఛానళ్లు వినోద ఛానళ్లుగా పనిచేస్తున్నాయన్నారు.
- ప్రాంతాలు, వర్గాల వారీగా చూసినా.. ఇదే రకమైన అభిప్రాయాలను వెల్లడించారు. దక్షిణ భారతంలో మాత్రం ఇతర ప్రాంతాలతో పోల్చితే కాస్త తక్కువగా 67.1శాతం మంది వార్తా ఛానళ్లలో న్యూస్కన్నా వినోదం ఎక్కువగా ఉందని చెప్పారు.
లాక్డౌన్ ప్రభావం..
లాక్డౌన్ కారణంగా చిత్రీకరణలు, సినీ నిర్మాణ రంగానికి బ్రేక్ పడటం వల్ల కొత్త కంటెంట్ దాదాపు నిలిచిపోయింది. ఈ సమయంలో వార్తా ఛానళ్ల వైపు ప్రేక్షకులు మొగ్గు చూపారు. కానీ, వార్తా ఛానళ్లలో వినోదం కోరుకోవటం వల్ల వాటి విశ్వసనీయత చాలా రకాలుగా దెబ్బతినే ప్రమాదముందని నిపుణులు హెచ్చరిస్తున్నారు.
ఈ సర్వేను ఐఏఎన్ఎస్ సీ-ఓటర్ మీడియా ట్రాకర్ నిర్వహించింది. దేశవ్యాప్తంగా అన్ని జిల్లాల్లోని 5 వేల మందిని ప్రశ్నించింది.
ఇదీ చూడండి: సామాజిక మాధ్యమాల వేదికగా రాజకీయ పోరు
