నేడు రాష్ట్రపతి వద్దకు విపక్ష బృందం

కేంద్ర వ్యవసాయ చట్టాలపై రైతుల ఆందోళనలు కొనసాగుతున్న నేపథ్యంలో ఈ అంశంపై విపక్షాల తరపు బృందం బుధవారం సాయంత్రం రాష్ట్రపతిని కలవనుంది.

కేంద్రం తీసుకొచ్చిన వ్యవసాయ చట్టాలపై విపక్ష పార్టీలు రాష్ట్రపతి రామ్​నాథ్ కోవింద్​ను కలవనున్నాయి. చట్టాలను రద్దు చేయాలని రాష్ట్రపతిని కోరనున్నట్లు తెలిపాయి.

ఐదుగురు నేతలు సాయంత్రం 5 గంటలకు రాష్ట్రపతిని కలుస్తారని సంబంధిత వర్గాలు స్పష్టం చేశాయి. సీపీఎం ప్రధాన కార్యదర్శి సీతారాం ఏచూరీ, కాంగ్రెస్ నేత రాహుల్ గాంధీ, ఎన్​సీపీ అధినేత శరద్ పవార్, డీఎంకే ప్రతినిధి, సీపీఐ ప్రధాన కార్యదర్శి డీ రాజా విపక్ష పార్టీల తరపున హాజరుకానున్నట్లు వెల్లడించాయి.

కేబినెట్ భేటీ..

నేడు ఉదయం కేంద్ర కేబినెట్​ భేటీ కానుంది. రైతుల ఆందోళనలు సహా పలు కీలక విషయాలపై ఈ సమావేశంలో చర్చించనున్నారు మంత్రులు.