కరోనా వైరస్పై పోరాటంలో వైద్య సిబ్బంది విశ్రాంతి లేకుండా పని చేస్తున్నారు. అయితే.. ఈ మహమ్మారి వారినీ వదలట్లేదు. కొవిడ్-19 బారిన పడుతున్న వారి సంఖ్య రోజు రోజుకు పెరుగుతోంది. దిల్లీలోని అఖిల భారత వైద్య విద్యా సంస్థ (ఎయిమ్స్)లో ఇప్పటి వరకు 195 మంది వైద్య సిబ్బందికి కరోనా పాజిటివ్గా తేలింది.
2 రోజుల్లో 50 మందికిపైగా..
గత రెండు రోజుల్లోనే 50 మందికిపైగా వైద్య సిబ్బందికి కరోనా సోకింది. అందులో ఒక ఎంబీబీఎస్ విద్యార్థి, ముగ్గురు రెసిడెంట్ డాక్టర్లు, 8 మంది నర్సులు, ఐదుగురు మెస్ సిబ్బంది సహా ల్యాబ్ సిబ్బంది, టెక్నీషియన్స్, పారిశుద్ధ్య కార్మికులు, సెక్యూరిటీ గార్డ్స్ ఉన్నారు. వారితో సన్నిహితంగా ఉన్న వారిని గుర్తించే చర్యలు చేపట్టారు అధికారులు.
" కరోనా పాజిటివ్గా తేలిన వైద్య, సహాయ సిబ్బందిలో.. కరోనా ప్రభావిత, ప్రభావం లేని ప్రాంతాల్లోని ఆస్పత్రులకు చెందిన వారు ఉన్నారు. ఇంజినీరింగ్, ల్యాబ్స్, క్యాంటీన్, ఆపరేషన్ థియేటర్, వార్డ్ సిబ్బంది వంటి అన్ని విభాగాలకు చెందిన ఉద్యోగులు కరోనా బారిన పడ్డారు. ఫిబ్రవరి 1 నుంచి ఇప్పటి వరకు 195 మందికి పాజిటివ్గా తేలింది. అందులో ఇద్దరు అధ్యాపకులు, ఐదుగురు రెసిడెంట్ డాక్టర్లు, 21 మంది నర్సులు, 8 మంది టెక్నీషియన్లు, 32 మంది పారిశుద్ధ్య కార్మికులు, 68 మంది సెక్యూరిటీ గార్డ్స్ ఉన్నారు. అందులో కొందరు వైరస్ నుంచి కోలుకుని తిరిగి విధుల్లో చేరారు. "
– అధికారులు, దిల్లీ ఎయిమ్స్
ఈ నెల 24న ఎయిమ్స్లో పనిచేసే పారిశుద్ధ్య విభాగం సూపర్ వైజర్ కరోనాతో ప్రాణాలు కోల్పోయాడు. గత వారం మెస్ సిబ్బంది ఒకరు మరణించారు.
