సోషల్ మీడియాలో సగం వార్తలు నకిలీవే!
దేశంలో సాధారణ ఎన్నికల వేళ సామాజిక మాధ్యమాల్లో నకిలీ వార్తల వ్యాప్తి భారీగా పెరుగుతోంది. గడిచిన 30 రోజుల్లో ఫేస్బుక్, వాట్సప్ వంటి మాధ్యమాల్లో వచ్చిన సమాచారంలో సగానికిపైగా నకిలీ వార్తలేనని ఓ సర్వే తెలిపింది. సోషల్ మీడియా వినియోగించే ప్రతి ఇద్దరిలో ఒకరికి నకిలీ వార్తలే అందుతున్నాయని ఇన్స్టిట్యూట్ ఫర్ గవర్నెన్స్, పాలసీస్, పాలిటిక్స్ (ఐజీపీపీ) సర్వే తేల్చింది.
సర్వేలోని అంశాలు:
- వివిధ సామాజిక మాధ్యమాల వేదికల్లో సుమారు 53 శాతం మంది నకిలీ వార్తలు వచ్చినట్లు పేర్కొన్నారు.
- వినియోగదారులను తప్పుదోవ పట్టించేందుకు ఫేస్బుక్, వాట్సప్లనే ఎక్కువగా వినియోగిస్తున్నట్లు తేలింది. గడిచిన 30 రోజుల్లో ప్రతి ఇద్దరు భారతీయుల్లో ఒకరు నకిలీ వార్తలు వచ్చినట్లు ఒప్పుకున్నారు.
- సోషల్ మీడియాలోని సమాచారం నిజమైందా కాదా అని సుమారు 41 శాతం మంది గూగుల్, ఫేస్బుక్, ట్విట్టర్లో తనిఖీ చేస్తున్నారు.
- భారత్లో సుమారు యాభై లక్షల మంది ఓటర్లు అంతర్జాలాన్ని వినియోగిస్తున్నారు. ఈ నకిలీ వార్తల వల్ల ఎన్నికలపై భారీ స్థాయిలో ప్రభావం ఉంటుంది.
- దేశవ్యాప్తంగా 628 మంది ఓటర్లపై నమూనా సర్వే నిర్వహించారు. అందులో 56 శాతం మంది పురుషులు, 43 శాతం మంది మహిళలు, 1 శాతం ట్రాన్స్జెండర్స్ ఉన్నారు.
నకిలీ వార్తల వ్యాప్తిపై వాట్సప్ సంస్థను సంప్రదించగా 2019 ఎన్నికల నేపథ్యంలో నకిలీ వార్తల కట్టడికి అన్ని రకాల చర్యలు చేపట్టినట్లు తెలిపిందని ఐజీపీపీ వెల్లడించింది. ఫేస్బుక్ స్పందించటానికి నిరాకరించినట్లు పేర్కొంది.
