అయోధ్య వెళ్తున్నారా? రామమందిరంతోపాటు చూడాల్సిన బెస్ట్​ ప్లేసెస్​ ఇవే! ఓ లుక్కేయండి!

Best Places to Visit in Ayodhya: అయోధ్య వెళ్తున్నారా..? అయితే ఈ విషయం తెలుసుకోండి. కేవలం రామ మందిరం మాత్రమే కాదు అయోధ్యలో చూడాల్సిన ప్రదేశాలు చాలానే ఉన్నాయి. వాటి గురించి ఈ స్టోరీలో తెలుసుకుందాం..

Best Places to Visit in Ayodhya: అయోధ్య రామమందిరం ఈ నెల 22న అత్యంత ప్రతిష్టాత్మకంగా ప్రారంభోత్సవం జరగనుంది. రామ జన్మభూమిలో జరిగే ఈ చారిత్రాత్మక ఘట్టాన్ని కళ్లారా చూసేందుకు యావత్ ప్రపంచం ఎంతో ఆసక్తిగా ఎదురుచూస్తోంది. అంతేకాకుండా ఆ రాముల వారిని కనులారా దర్శించాలని భక్తులు భారీ సంఖ్యలో అయోధ్యకు తరలివెళుతున్నారు. మరి మీరు కూడా అయోధ్యకు వెళ్లాలని అనుకుంటున్నారా..? అయితే ఈ విషయం తెలుసుకోవాల్సిందే. ఎందుకంటే.. అయోధ్యలో కేవలం రామమందిరం మాత్రమే కాదు సందర్శించాల్సిన ముఖ్యమైన ప్రదేశాలు మరికొన్ని ఉన్నాయి. అంతదూరం వెళ్లినవారు.. ఇవి కూడా చూసి రండి మరి.. దీనికి సంబంధించిన పూర్తి వివరాలు ఈ స్టోరీలో తెలుసుకుందాం...

1. హనుమాన్ గర్హి:

• సమయాలు : ఉదయం 5:00 నుంచి రాత్రి 10:00 వరకు
• స్థానం : హనుమాన్ గర్హి, అయోధ్య
• ప్రవేశ రుసుము : ఉచితం
• ఎలా చేరుకోవాలి : అయోధ్య జంక్షన్ నుంచి దాదాపు 2 కి.మీ.

హనుమంతుడి గురించి ప్రత్యేకంగా చెప్పాల్సిన పని లేదు. శ్రీరాముడి గొప్ప భక్తుడు హనుమంతుడు. ఆయన వెలసిన ఆలయమే హనుమాన్​ గర్హి. ఈ ఆలయం ఓ కొండపై ఉంటుంది. ఇక్కడ హనుమంతుడిని దర్శించుకోవాలంటే.. సుమారు 76 మెట్లు ఎక్కాలి. రామ నవమి, హనుమాన్ జయంతి నాడు ఇక్కడ పెద్ద ఎత్తున పూజలు జరుగుతాయి. అయోధ్యకు రక్షకుడిగా భావించే వాయుపుత్రుడిని తప్పనిసరిగా దర్శించుకోవాలని పండితులు అంటుంటారు.

2. కనక్ భవన్

• సమయాలు : ఉదయం 5:00 నుంచి మధ్యాహ్నం 12:00, సాయంత్రం 4:00 నుంచి రాత్రి 9:00 వరకు
• స్థానం : తులసి నగర్, అయోధ్య
• ప్రవేశ రుసుము : ఉచితం
• ఎలా చేరుకోవాలి : రామజన్మభూమి నుంచి సుమారు 2 కి.మీ.

రామజన్మభూమికి సమీపంలో ఉన్న తులసి నగర్‌లో ఉంది ఈ కనక్ భవన్. దీనినే గోల్డెన్ ప్యాలెస్ అని కూడా పిలుస్తారు. ఈ ఆలయాన్ని 1891లో నిర్మించారు. అయోధ్యలో ఉన్న ఈ భవన్ అద్భుతమైన శిల్పకళా వైభవానికి సంకేతం. దశరథుడు తన మూడో భార్య కైకేయికి బహుమతిగా ఇచ్చిన రాజభవనం అని చెబుతారు. కైకైయి ఈ భవనాన్ని సీతాదేవికి ఇచ్చిందంటారు. ఇందులో సీతారాముల విగ్రహాలుంటాయి.

3. నాగేశ్వరనాథ్ ఆలయం

• సమయాలు : ఉదయం 6:00 నుంచి మధ్యాహ్నం 12:00, సాయంత్రం 4:00 నుంచి రాత్రి 9:00 PM
• స్థానం : తేరీ బజార్, అయోధ్య
• ప్రవేశ రుసుము : ఉచితం
• ఎలా చేరుకోవాలి : హనుమాన్ గర్హి నుంచి నడక దూరం.

శతాబ్దాల చరిత్ర కలిగిన ఈ ఆలయం.. అయోధ్యలోని తేరీ బజార్ పక్కన ఉంది. కొద్దిమంది శ్రీరాముడు స్వయంగా శివలింగాన్ని ప్రతిష్ఠించాడని నమ్మితే.. మరికొందరేమో శ్రీరాముని కుమారుడైన కుశలుడు స్థాపించినట్లు నమ్ముతారు. ఈ ఆలయంలో మహాశివరాత్రి, ప్రదోష వ్రత్ సమయంలో పెద్ద ఎత్తున పూజలు జరుగుతాయి. ఈ ఆలయంలోని శివలింగానికి భక్తులు సరయు నది నుంచి నీటిని తీసుకొచ్చి అభిషేకం చేస్తారు.

4. గులాబ్ బారి

• సమయాలు : ఉదయం 9:00 నుంచి సాయంత్రం 6:00 వరకు
• స్థానం : వైదేహి నగర్, అయోధ్య
• ప్రవేశ రుసుము : INR 20 (సుమారుగా)
• ఎలా చేరుకోవాలి : రామజన్మభూమికి దగ్గరగా ఉంది. రోడ్డు ద్వారా చేరుకోవచ్చు.

గులాబ్ బారీని గులాబీల తోట అని కూడా పిలుస్తారు. నవాబులు అయోధ్యలో నిర్మించిన అందమైన భవనాలలో ముఖ్యమైనవి గులాబ్ బారీ, మోతీ మహల్, బహు బేగం సమాధి . వీటిలో గులాబ్ బారిలో శిల్పకళ చూపుతిప్పుకోనివ్వదు.

5. త్రేతా కే ఠాకూర్ ఆలయం

• సమయాలు : ఏకాదశి నాడు మాత్రమే ఓపెన్​లో ఉంటుంది.
• స్థానం : నయా ఘాట్ దగ్గర, అయోధ్య
• ప్రవేశ రుసుము : ఉచితం

నయా ఘాట్ సమీపంలోని త్రేతా కే ఠాకూర్ ఆలయం.. దాని పురాతన, చారిత్రాత్మక శిల్పాలు సందర్శకులను చూపుతిప్పుకోనివ్వవు. రాముడు అశ్వమేధ యజ్ఞం చేసిన నేలపైనే ఈ ఆలయాన్ని 300 సంవత్సరాల క్రితం ఈ ప్రాంత రాజు కులు నిర్మించారని నమ్ముతారు. సంవత్సరానికి ఒకసారి మాత్రమే ఏకాదశి రోజున ఈ గుడిని తెరిచి ఉంచుతారు.

6. ఛోటీ చావ్నీ

• సమయాలు : ఉదయం 9:00 నుంచి సాయంత్రం 6:00 వరకు
• స్థానం : వాల్మీకి భవన్, అయోధ్య
• ప్రవేశ రుసుము : ఉచితం

ఈ భవనాన్నే వాల్మీకి భవన్ అని కూడా పిలుస్తారు. బౌద్ధ, హిందూ, జైన విభాగాలుగా విభజించిన ఈ సైట్.. ప్రాచీన భారతీయ నాగరికతల అందాలను ప్రదర్శిస్తుంది. గుహలలోని కైలాస దేవాలయం కళాత్మక ప్రకాశాన్ని పెంచుతుంది.

7. సీతా కి రసోయి

• సమయాలు : ఉదయం 6:00 నుంచి రాత్రి 8:00 వరకు
• స్థానం : రామజన్మభూమి దగ్గర, అయోధ్య
• ప్రవేశ రుసుము : ఉచితం
• ఎలా చేరుకోవాలి : రామజన్మభూమి నుంచి నడక దూరం.

అయోధ్య వెళ్లేవారు సీతా కి రసోయి పేరు తప్పకుండా వింటారు. రామ జన్మభూమికి సమీపంలో ఈ సీతా కి రసోయి ఉంది. ఇది సీతాదేవి వంటగది. ఇప్పుడిది దేవాలయంగా రూపాంతరం చెందింది. నాటికాలం వంటపాత్రలు, వంట సామగ్రిని ఇక్కడ చూడొచ్చు.

8. తులసి స్మారక్ భవన్:

• సమయాలు : ఉదయం 8:00 నుంచి రాత్రి 8:00 వరకు
• స్థానం : అయోధ్య
• ప్రవేశ రుసుము : ఉచితం

సాధువు-కవి గోస్వామి తులసీదాస్ గౌరవార్థం నిర్మించిన తులసి స్మారక్ భవన్ ఒక సాంస్కృతిక కేంద్రంగా, పరిశోధనా కేంద్రంగా ఉంది. జాతీయ రహదారికి తూర్పు చివరన ఉన్న ఈ స్మారక్.. అయోధ్య సాంస్కృతిక, ఆధ్యాత్మిక వారసత్వానికి సంబంధించిన గొప్ప సాహిత్య రిపోజిటరీని కలిగి ఉంది. ప్రాంగణంలోని అయోధ్య రీసెర్చ్ సంస్థాన్.. అయోధ్య సాహిత్య, సాంస్కృతిక, ఆధ్యాత్మిక జ్ఞానాన్ని అధ్యయనం చేయడంపై దృష్టి పెడుతుంది.

9. బహు బేగం కా మక్బారా

• సమయాలు : ఉదయం 6:00 నుంచి సాయంత్రం 6:00 వరకు
• స్థానం : మక్బారా రోడ్, ఫైజాబాద్
• ప్రవేశ రుసుము : INR 25 (సుమారు.)
• ఎలా చేరుకోవాలి : అయోధ్య నుండి 7 కి.మీ. రోడ్డు ద్వారా బాగా కనెక్ట్ చేయబడింది.

ఫైజాబాద్‌లోని మక్బరా రోడ్‌లో ఉన్న బహు బేగం కా మక్బరా, దాని సౌష్టవ రూపకల్పన, నిర్మాణ నైపుణ్యం కారణంగా "తూర్పు తాజ్ మహల్"గా నిలుస్తుంది. నవాబ్ సుజా-ఉద్-దౌలా భార్య బేగం ఉన్మతుజ్జోహ్రా బానో జ్ఞాపకార్థం నిర్మించిన ఈ సమాధి చూడటానికి చాలా బాగుంటుంది. మూడు గోపురాలు, సంక్లిష్టంగా డిజైన్ చేయబడిన ఇంటీరియర్‌లు, అద్భుతంగా పెయింట్ చేయబడిన గోడలు, పైకప్పులతో.. బహు బేగం కా మక్బరా గత యుగం గొప్పతనాన్ని ప్రతిబింబిస్తుంది. ఆర్కియాలజికల్ సర్వే ఆఫ్ ఇండియా ఈ ప్రదేశాన్ని సంరక్షిస్తుంది.

10. రాజ మందిర్:

• సమయాలు: ఉదయం7 నుంచి రాత్రి 8 వరకు
• స్థానం : ఘగ్గర్ నది ఒడ్డున, అయోధ్య
• ప్రవేశ రుసుము : ఉచితం

అయోధ్యలో రాజమందిరం కూడా చూడాల్సిన ప్రదేశం. ఘగ్గర్ నది ఒడ్డున ఉన్న రాజ మందిరం పౌరాణిక ఇతిహాసాలతో నిండిన ఆలయం. నాటి కాలం విగ్రహాలు, దేవుళ్లు - దేవతలకు సంబంధించిన ఎన్నో విగ్రహాలు ఇక్కడ ఉంటాయి.

11. మోతీ మహల్

• సమయాలు : ఉదయం 9:00 నుండి సాయంత్రం 5:00 వరకు
• స్థానం : ఫైజాబాద్
• ప్రవేశ రుసుము : ఉచితం
• ఎలా చేరుకోవాలి : అయోధ్య నుంచి 7 కి.మీ. రోడ్డు ద్వారా చేరుకోవచ్చు.

మోతీ మహల్.. ఫైజాబాద్‌లోని చారిత్రాత్మక స్మారక చిహ్నం. దీనిని వాడుక భాషలో "పెర్ల్ ప్యాలెస్" అని పిలుస్తారు. మొఘల్ నిర్మాణ శైలిని ఉపయోగించి దీనిని రూపొందించారు.

12. దశరథ్ భవన్

• సమయాలు : ఈవెంట్‌ల సమయంలో ఓపెన్​ అవుతుంది.
• స్థానం : అయోధ్య
• ప్రవేశ రుసుము : ఈవెంట్‌లను బట్టి మారుతుంది.

దశరథ్ భవన్​ని.. రాముల వారి తండ్రి దశరథుడి పురాతన ఇల్లు అని నమ్ముతారు. ప్రస్తుతం దానిని మతపరమైన, చారిత్రక ప్రాముఖ్యత కోసం సెట్​ చేశారు. ఇక్కడ పలు ఈవెంట్లు జరుగుతాయి. ఆ సమయంలో మాత్రమే ఇవి ఓపెన్​ అవుతాయి..

13. రామ్ కి పైడి:

• సమయాలు : 24 గంటలు తెరిచే ఉంటుంది.
• స్థానం : సరయూ నది ఒడ్డున, అయోధ్య
• ప్రవేశ రుసుము : ఉచితం

రామ్ కి పైడి.. సరయు నది ఒడ్డున ఉన్న ఓ ఘాట్‌. యాత్రికులు, భక్తులు.. పవిత్ర స్నానం చేయడానికి అవకాశం ఉంటుంది. వార్షిక దీపోత్సవ్ ఈవెంట్, దీపాల వేడుకలు ఇక్కడ ప్రత్యేకంగా చేస్తారు. నైట్​ టైమ్​లో ఈ ఘాట్​ చాలా బాగుంటుంది.

14. రామ్ కథా పార్క్:

• సమయాలు : ఉదయం 6:00 నుంచి రాత్రి 8:00 వరకు
• స్థానం : అయోధ్య
• ప్రవేశ రుసుము : ఉచితం

అయోధ్యలో రామ్ కథా పార్కు ఒక అద్భుతమైన ప్రదేశం. ఇక్కడ రామ మందిరానికి సంబంధించి సాంస్కృతిక ప్రదర్శనలు, ప్రార్ధనా సమావేశాలు, అనేక ఇతర కార్యక్రమాలు ఉంటాయి. ఈ ప్రదేశం కూడా చూడదగినది.

15. మణి పర్వత్​: ఈ పర్వతం హిందూ మతంలో అత్యంత ప్రాముఖ్యత ఉన్న పర్వతం. హనుమాన్ సంజీవని పర్వతాన్ని తీసుకు వెళ్తున్న సమయంలో కొంతభాగం ఇక్కడ పడిందని చెప్తారు. ఇక ఇక్కడే బౌద్ద విహారం, స్థూపం కూడా ఉన్నాయి. ఇవి ప్రతీ ఒక్కరూ తప్పక చూడవలసినవి.

16. దేవకాళి దేవాలయం: అయోధ్య సమీపం ఫైజాబాద్​లో ఉంది దేవకాళి దేవాలయం. ఈ ఆలయంలో గిరిజా దేవి కొలువై ఉంటుంది. వివాహం అనంతరం అయోధ్యకు వచ్చినప్పుడు సీతాదేవి తనవెంట తీసుకొచ్చిన విగ్రహం ఇది అని..స్వయంగా దశరథ మహారాజు ఆలయాన్ని నిర్మించి ఆ విగ్రహాన్ని ప్రతిష్ఠించాడని పురాణాలు చెబుతున్నాయి.