Bed Roll Kit For RAC Passengers In AC Trains : రైల్వే ఏసీ కంపార్ట్మెంట్లలో ప్రయాణించే ఆర్ఏసీ ప్యాసింజర్ల విషయంలో కీలక నిర్ణయం తీసుకుంది ఇండియన్ రైల్వే. ఇక నుంచి ఆర్ఏసీ టికెట్ కలిగిన ప్రతి ప్రయాణికుడికి ప్రత్యేక బెడ్ రోల్ కిట్ను అందించనున్నట్లు తెలిపింది. ఈ మేరకు రైల్వే బోర్డు ప్రిన్సిపల్ ఎగ్జిక్యూటివ్ డైరెక్టర్ శైలేంద్ర సింగ్ చెప్పారు. ఈ కిట్లో ఒక బెడ్షీట్, దుప్పటి, టవల్తో పాటు ఓ తలగడ కూడా ఉంటుందని వివరించారు. అయితే ఈ నిర్ణయం ఏసీ ఛైర్ కార్ ప్రయాణికులకు వర్తించదని ఆయన చెప్పారు.
ఈ బెడ్ రోల్ కిట్కు సంబంధించిన ఛార్జీలను ఆర్ఏసీ ప్రయాణికులు బుక్ చేసుకునే టికెట్ రుసుములోనే చెల్లిస్తున్నారని రైల్వే అధికారి ఒకరు తెలిపారు. దీనికి సంబంధించి పూర్తి మార్గదర్శకాలతో కూడిన ఓ లేఖను ఇప్పటికే అన్నీ జోన్ల జనరల్ మేనేజర్లకు పంపినట్లు శైలేంద్ర సింగ్ తెలిపారు. ప్రతి ఆర్ఏసీ( Reservation Against Cancellation ) ప్రయాణికుడికి ఈ సదుపాయం అందేలా ఏర్పాట్లు చేయాలని అధికారులను ఆదేశించినట్లు ఆయన అన్నారు.
"ఈ బెడ్ రోల్ కిట్ సదుపాయం ఏసీ క్లాస్లలో(ఏసీ ఛైర్ కార్ మినహా) ప్రయాణించే ప్యాసింజర్లకు ఇబ్బంది కలగకుండా, వారిని కూడా ఇతర ప్రయాణికుల(కన్ఫర్మ్డ్ ప్యాసెంజర్స్)తో సమానంగా చూడాలనే ఉద్దేశంతోనే ఈ నిర్ణయం తీసుకున్నాము. వీటి ధరను కూడా నామమాత్రంగానే టికెట్ రుసుములోనే వసూలు చేస్తున్నాము. ఇది వారికి సౌకర్యవంతమైన ప్రయాణ అనుభూతిని కలిగిస్తుంది."
- శైలేంద్ర సింగ్, రైల్వే బోర్డు ప్రిన్సిపల్ ఎగ్జిక్యూటివ్ డైరెక్టర్
ఆర్ఏసీ టికెట్ అంటే ఏంటి?
ఆర్ఏసీ- రిజర్వేషన్ ఎగైనిస్ట్ క్యాన్సలేషన్. అంటే ఒకే ట్రైన్ బెర్త్ను ఇద్దరు ప్రయాణికులకు విక్రయిస్తుంది రైల్వే శాఖ. అంటే ఒకే బెర్తును ఇద్దరు పంచుకోవాల్సి ఉంటుంది. ఉదాహరణకు ఒక వ్యక్తి రిజర్వేషన్ పద్ధతిలో ముందే S1 బెర్తును కన్ఫామ్ చేసుకున్నాడు. ఇప్పుడు అదే నంబర్ బెర్త్ను ఇంకో వ్యక్తి ఆర్ఏసీ కింద ఒకే రోజు(ఇద్దరి ప్రయాణం ఒకేసారి)కు కొనుగోలు చేశాడనుకుందాం. అయితే ముందుగా రిజర్వేషన్ చేసుకున్న ప్యాసింజర్ పలు కారణాలతో తన ప్రయాణాన్ని రద్దు చేసుకుంటే ఆ బెర్తు పూర్తిగా ఆర్ఏసీ ప్యాసింజర్కు లభిస్తుంది. అలా జరగని పక్షంలో ఆ సీటు లేదా బెర్తును ఇద్దరు షేర్ చేసుకోవాల్సి ఉంటుంది. ఇలా ఇద్దరిలో రిజర్వేషన్ ప్యాసింజర్కు ఎలాగో కేటాయించిన బెర్తుపైనే రోలింగ్ బెడ్ కిట్ మాదిరి సెటప్ ఉంటుంది. రెండో వ్యక్తైన ఆర్ఏసీ ప్యాసింజర్కు ఉండదు. అందుకని అలాంటి వారు(ఆర్ఏసీ ప్రయాణికుడు) కూడా ఇబ్బంది పడకూడదనే కారణంతోనే ఈ నిర్ణయం తీసుకున్నట్లు తెలిపారు రైల్వే అధికారులు.
తమిళనాడు విద్యాశాఖ మంత్రికి మూడేళ్ల జైలుశిక్ష- ఆ కేసులోనే!
'పార్లమెంటులో ఉపరాష్ట్రపతి కులతత్వాన్ని రగిల్చారు'- విపక్షాల నిరసనలో ఖర్గే
