కరోనా కట్టడికి రాష్ట్రాలు విధిస్తున్న లాక్డౌన్.. బడుగు జీవుల పాలిట పెను శాపంగా మారుతోందనడానికి సాక్ష్యంగా నిలిచే సంఘటన బిహార్లో జరిగింది. లాక్డౌన్తో ఉపాధి కోల్పోయి.. నిరాశకు గురైన ఓ డ్రైవర్ తన సొంత ఆటోనే తగలబెట్టాడు.
అసలేమైందంటే..
బిహార్లోని పూర్ణియాకు చెందిన రవి అనే ఆటో డ్రైవర్కు కరోనా ప్రభావం వల్ల 8 నెలలుగా.. ఉపాధి అంతంత మాత్రంగానే సాగింది. ఈ క్రమంలో తన భార్య పుట్టింటికి వెళ్లిపోయింది. తన ఇద్దరు పిల్లల్ని కూడా ఆమె తన వెంట తీసుకెళ్లింది. తన కడుపు నింపే ఆటో కాస్తా పాతదైపోయింది. షోరూమ్లో ఈ ఆటోకు బదులు వేరే ఆటోను మార్చుకునేందుకు ప్రయత్నిస్తే.. వారు అందుకు భారీ డబ్బులు డిమాండ్ చేశారు.
విసిగిపోయి..
ఉన్న ఆటోనే ఏదోలా నడిపిస్తూ.. 'తినడానికి డబ్బులైనా మిగులుతున్నాయి కదా' అని అనుకుంటున్న సమయంలో.. కరోనా రెండో దశ విజృంభణ మొదలైంది. వైరస్ వ్యాప్తి కట్టడికి మే1 నుంచి మే15 వరకు లాక్డౌన్ విధించింది బిహార్ ప్రభుత్వం. మే 15 తర్వాతనైనా.. మళ్లీ తన ఆటోను రోడ్డు మీదకు ఎక్కించాలని ఓపికతో ఎదురు చూశాడతడు. కానీ, ప్రభుత్వం మాత్రం లాక్డౌన్ను జూన్ 1 వరకు పొడిగిస్తున్నట్లు ప్రకటించింది. దాంతో విసిగిపోయిన రవికుమార్ తన ఆటోను పెట్రోల్ పోసి తగలబెట్టాడు.
ఈ ఆటోను కాల్చగా.. మిగిలిన ఇనుప సామగ్రిని అమ్మి.. రేషన్ సరకులైనా కొనుక్కుంటానని చెప్పాడు రవి. అందుకే తన ఆటోకు నిప్పు అంటించానని వివరించాడు. రవి తన ఆటోను తగలబెడుతున్నాడని తెలిసి.. చుట్టుపక్కల వారు అక్కడికి చేరుకున్నారు. తమ ఫోన్లలో వీడియో రికార్డు చేశారు.
ఇదీ చూడండి: కారు సీటుబెల్టుకు కట్టి కొవిడ్ మృతదేహం తరలింపు
ఇదీ చూడండి: లైవ్ వీడియో: నిశ్శబ్దంగా శునకాన్ని వేటాడిన మొసలి
