ATM Robbery: ఏటీఎంలో డబ్బులు నింపేందుకు వచ్చిన సిబ్బందిపై కాల్పులు జరిపి దాదాపు రూ.20 లక్షలు దోచుకెళ్లాడు ఓ దుండగుడు. ఈ కాల్పుల్లో ఆ ఏటీఎం సెక్యూరిటీ గార్డు ప్రాణాలు కోల్పోయాడు. ఈ ఘటన మధ్యప్రదేశ్లోని జబల్పుర్లో శుక్రవారం మధ్యాహ్నం జరిగింది.
డబ్బులు నింపుదామని వస్తే..
సుమారు మధ్యాహ్నం 2 గంటల సమయంలో తిల్హరీ ప్రాంతంలో ఉన్న బ్యాంక్ ఆఫ్ మహారాష్ట్ర ఏటీఎంలో డబ్బులు నింపేందుకు సిబ్బంది వచ్చారు. వాళ్లు ఆ ఏటీఎంలోకి ప్రవేశించగానే అక్కడే ఉన్న నిందితుడు వారిపై కాల్పులు జరిపాడు. ఈ ఘటనలో సెక్యూరిటీ గార్డు రాజ్ బహదూర్ పటేల్ (46) ప్రాణాలు కోల్పోగా.. అభిలాష్ యాదవ్, రాజ్ సింగ్లు తీవ్రంగా గాయపడ్డారు. అనంతరం నగదు తీసుకుని నిందితుడు మరొవ్యక్తి సాయంతో పరారయ్యాడు.
నిందితుడు ఐదు నుంచి ఆరు రౌండ్లు కాల్పులు జరిపాడని.. దాదాపు రూ.20 లక్షలు ఉన్న క్యాష్ బాక్స్ను ఎత్తుకెళ్లాడని అధికారులు వెల్లడించారు. సీసీటీవీ ఫూటేజ్ ఆధారంగా నిందితుడి కోసం గాలిస్తున్నట్లు పేర్కొన్నారు.
ఇదీ చూడండి : ప్రేమించడమే పాపం... యువకుడిపై పెట్రోల్ పోసి నిప్పంటించి..
