Assembly Elections Result 2023 : కర్ణాటక అసెంబ్లీ ఎన్నికల్లో కాంగ్రెస్ పార్టీ విజయభేరి మోగించింది. 135 సీట్లు గెలిచి ప్రభుత్వాన్ని ఏర్పాటు చేసేందుకు కావాల్సిన మెజారిటీని సాధించింది. అధికార బీజేపీకి భంగపాటు తప్పలేదు. 66 స్థానాలతో సరిపెట్టుకుంది. జేడీఎస్ 19 సీట్లు గెలవగా.. ఇతరులు 4 స్థానాల్లో విజయం సాధించారు. ఇక, 2018తో పోలిస్తే బీజేపీ పరిస్థితి మరింత దిగజారింది. అయితే, ఈసారి ఈ కాంగ్రెస్, బీజేపీలకు రెబల్స్ బెడద ఎక్కువైంది. టికెట్ ఆశించి భంగపడ్డ నేతలు రెబల్స్గా బరిలోకి దిగారు. కాంగ్రెస్తో పోలిస్తే.. ఈ రెబల్స్ వల్ల బీజేపీకి తీవ్ర నష్టం జరిగింది.
అమెరికా ప్రైమరీ విధానం ఫెయిల్
బీజేపీ విఫలమవడానికి మరో కారణం.. ఆ పార్టీ అనుసరించిన అమెరికా ప్రైమరీ విధానం. ఈసారి సిట్టింగ్ స్థానాల్లో అభ్యర్థుల మార్పుతో ప్రభుత్వ వ్యతిరేకతను అధిగమించాలని వ్యూహాలు రచించిన బీజేపీ.. అందులో భాగంగా మొత్తం 224 స్థానాల్లోని 72 చోట్ల కొత్త అభ్యర్థులను బరిలోకి దించింది. ఈ నిర్ణయం తమకు కలిసివస్తుందనుకున్న బీజేపీ.. రెబల్స్ను బుజ్జగించడంలో విఫలమైంది. ఇక, దాదాపు 24 మంది రెబల్స్ వల్ల కాంగ్రెస్కు ఎదురుదెబ్బ తగిలింది. 13 మందికి పైగా రెబల్స్ బీజేపీకి షాక్ ఇచ్చారు.
బీజేపీ కొంపముంచిన రెబల్స్..
దావనగెరె జిల్లా మాయకొండ నియోజకవర్గంలో మాజీ ఎమ్మెల్యే ప్రొఫెసర్ లింగన్నను కాదని బీజేపీ.. బసవరాజ్ నాయక్కు టికెట్ ఇచ్చింది. దీంతో లింగన్న సహా టికెట్ ఆశించిన మరో 10 మంది అభ్యర్థులు రెబల్స్గా బరిలోకి దిగారు. ఓట్లు చీలడం వల్ల కాంగ్రెస్ అభ్యర్థి కేఎస్ బసవంతప్ప విజయం సాధించారు. ఇదే జిల్లాలోని చన్నగిరి అసెంబ్లీ స్థానంలో బీజేపీ సిట్టింగ్ ఎమ్మెల్యేను అవినీతి ఆరోపణలతో లోకాయుక్త అరెస్టు చేసింది. దీంతో ఆయన కుమారుడు టికెట్ అడిగినా.. వారినీ కాదని హెచ్ఎస్ శివకుమార్ను బరిలోకి దింపారు. బీజేపీపై వ్యతరేకతతో కాంగ్రెస్ అభ్యర్థి బసవరాజు వీ శివగంగ విజయం సాధించారు. చిత్రదుర్గ జిల్లాలోని హొసదుర్గ స్థానంలో సిట్టింగ్ ఎమ్మెల్యే గూలిహట్టి శేఖర్ స్థానంలో ఎస్ లింగమూర్తికి టెకెట్ ఇచ్చింది బీజేపీ. ఇండిపెండెంట్గా బరిలోకి దిగారు శేఖర్. దీంతో కాంగ్రెస్ అభ్యర్థి బీజీ గోవిందప్ప గెలుపొందారు.
ఇక దక్షిణ కన్నడ జిల్లాలోని పుట్టూరు నుంచి కూడా సిట్టింగ్ ఎమ్మెల్యే సంజీవ్ మథందుర్ను కాదని ఆశ తిమ్మప్పకు టికెట్ ఇచ్చారు. హిందూ లీడర్ అయిన అరుణ్ పట్టిళ్ల కూడా టికెట్ ఆశించారు. టికెట్ దక్కకపోవడం వల్ల ఈ ఇద్దరు రెబల్స్గా బరిలోకి దిగారు. ఈ పరిణామం కాంగ్రెస్ అభ్యర్థి అశోక్ కుమార్ రాయ్కు కలసివచ్చింది. చిక్కమంగళూరు జిల్లాలో ఎంపీ కుమార్ స్వామికి టికెట్ నిరాకరించి దీపక్ దొడ్డయ్యను బరిలోకి దింపింది బీజేపీ. దీంతో పార్టీకి రాజీనామా చేసి జేడీఎస్ నుంచి బరిలోకి దిగారు కుమార స్వామి. హుబ్బళ్లి సెంట్రల్ నుంటి టికెట్ ఆశించి భంగపడ్డ బీజేపీ మాజీ ముఖ్యమంత్రి జగదీశ్ శెట్టర్, అత్తాని నుంచి టికెట్ రాలేదని నిరాశ చెందిన లక్షణ సవాడి బీజీపీకి రాజీనామా చేసి కాంగ్రెస్లో జాయిన్ అయ్యారు.
రెబల్స్తో భంగపడ్డ కాంగ్రెస్..
చిక్కబళ్లపుర్ జిల్లా శిద్లఘట్ట అసెంబ్లీ స్థానం నుంచి రాజీవ్ గౌడ పోటీచేశారు. టికెట్ ఆశించి నిరాశచెందిన వి మునియప్ప, అంజనప్ప రెబల్స్గా బరిలోకి దిగారు. కాగా, వీరి కుమ్ములాటల మధ్య జేడీఎస్ అభ్యర్థి బీఎన్ రవికుమార్ విజయం సాధించారు. ఇక గడగ్ జిల్లా శిరహట్టిలో సూజన్ ఎన్ దొడ్డమని కాంగ్రెస్ నుంచి బరిలోకి దిగగా.. రామకృష్ణ దొడ్డమని రెబల్గా పోటీ చేశారు. వీరిద్దరిపై బీజేపీ అభ్యర్థి రామప్ప సోబెప్ప లమయ్ విజయం సాధించారు.
తుమకూరు జిల్లా కునిగల్లో మాజీ ఎమ్మెల్యే రామస్వామి గౌడ రెబల్గా పోటీ చేయగా.. కాంగ్రెస్ అభ్యర్థి డాక్టర్ హెడ్డీ రంగనాథ్ విజయం సాధించారు. దావణగెర జిల్లాలోనూ అసంతృప్త సిట్టింగ్ ఎమ్మెల్యే, మరో రెబల్ అభ్యర్థి మాజీ ఎమ్మెల్యే హెచ్పీ రాజేశ్పై కొత్త అభ్యర్థి బీ దేవేంద్రప్ప గెలుపొందారు. ఇక బళ్లారి జిల్లా హరపనహళ్లిలో కాంగ్రెస్ అభ్యర్థిగా ఎన్ కోట్రేశ్ బరిలోకి దికారు. టికెట్ ఆశించి భంగపడ్డ కేపీసీసీ జనరల్ సెక్రటరీ ఎమ్పీ లతా మల్లికార్జున ఇండిపెండెంట్గా పోటీచేశారు. దీంతో బీజేపీ సిట్టింగ్ ఎమ్మల్యే జీ కరుణాకర రెడ్డిపై లత విజయం సాధించారు.
