అసోం నూతన సీఎంగా హిమంత బిశ్వ శర్మ సోమవారం మధ్యాహ్నం 12 గంటలకు ప్రమాణ స్వీకారం చేయనున్నారు. రాజభవన్లో జరిగే కార్యక్రమంలో ఆయనతో పాటు మంత్రులు కూడా ప్రమాణం చేయనున్నారు. తనను ముఖ్యమంత్రిగా ఎంపిక చేసినందుకు ప్రధాన మంత్రి నరేంద్ర మోదీ, భాజపా జాతీయ అధ్యక్షుడు జేపీ నడ్డా, అసోం మాజీ సీఎం సర్బానంద సోనోవాల్కు హిమంత కృతజ్ఞతలు తెలిపారు. తనపై ఉంచిన నమ్మకాన్ని నిలబెడతానని, సరైన పాలన అందిస్తానని చెప్పారు.
వారం రోజులుగా నెలకొన్న ఉత్కంఠకు తెరదించుతూ గువాహటిలో ఆదివారం మధ్యాహ్నం జరిగిన సమావేశంలో హిమంతను ఎన్డీఏ శాసనసభా పక్షనేతగా ఏకగ్రీవంగా ఎన్నుకున్నారు ఆ కూటమి పార్టీల నేతలు. ఈ సమావేశంలో కేంద్ర మంత్రి నరేంద్ర సింగ్ తోమర్, భాజపా జాతీయ కార్యదర్శి అరుణ్ సింగ్ సహా పార్టీ పరిశీలకులు పాల్గొన్నారు.
భేటీ పూర్తయ్యాక నేరుగా రాజ్భవన్ వెళ్లి అసోం గవర్నర్ జగదీశ్ ముఖిని కలిశారు హిమంత. ప్రభుత్వాన్ని ఏర్పాటు చేసేందుకు అవసరమైన మద్దతు తనకు ఉందని భాజపా, ఏజీపీ, యూపీపీఎల్ ఎమ్మేల్యేలు సంతకాలు చేసిన లేఖను సమర్పించారు. అనంతరం హిమంతను ముఖ్యమంత్రిగా నియమిస్తూ గవర్నర్ ఉత్తర్వులు జారీ చేశారు.
ప్రతిపక్షాల శుభాకాంక్షలు..
అసోం ముఖ్యమంత్రిగా ఎంపికైనందుకు హిమంతకు ప్రతిపక్ష కాంగ్రెస్, ఏఐయూడీఎఫ్ శుభాకాంక్షలు తెలిపాయి. నూతన సీఎం రాష్ట్రాన్ని అభివృద్ధి పథంలో నడిపిస్తారని ఆశిస్తున్నట్లు అసోం కాంగ్రెస్ చీఫ్ రిపున్ బోరా ట్వీట్ చేశారు. హిమంత అంకిత భావంతో పనిచేస్తారని ఆశిస్తున్నట్లు ఏఐయూడీఎఫ్ చీఫ్ బహ్రుద్దిన్ అజ్మల్ ట్విట్టర్ వేదికగా అభినందనలు తెలిపారు.
సోనోవాల్పై పొగడ్తలు
తనకు సీఎం అవకాశం ఇచ్చిన మాజీ ముఖ్యంత్రి సర్బానంద సోనోవాల్పై ప్రశంసల వర్షం కురిపించారు హిమంత. ఆయన ఐదేళ్ల పాలనలో ఓక్క అవినీతి ఆరోపణ కూడా లేదని కొనియాడారు. సర్బానందే తనకు మార్గదర్శకుడని, ఆయన దిశానిర్దేశం మేరకే నడుచుకుంటానని చెప్పారు.
