ముంబయి పోలీసులకు ముచ్చెమటలు పట్టించాడు ఓ 9వ తరగతి విద్యార్థి. తాజ్ హోటల్కు ఫోన్ చేసిన అతడు.. 'ఇద్దరు ఉగ్రవాదులు హోటల్లోకి వస్తున్నారు.. పోలీసులతో బందోబస్తు ఏర్పాటు చేయండి' అంటూ ప్రాంక్ కాల్ చేశాడు. దాంతో.. హోటల్ యాజమాన్యం, పోలీసులు సహా అక్కడి ప్రజలు ఒక్కసారిగా ఆందోళనకు గురయ్యారు.
బాంబు డిటెక్టర్లతో..
మధ్యాహ్నం 3:30 గంటలకు తాజ్ హోటల్ రిసెప్షన్ కౌంటర్కు సదరు 9వ విద్యార్థి ఈ కాల్ చేశాడని పోలీసులు తెలిపారు. ఇద్దరు ఉగ్రవాదులు హోటల్లోకి వస్తున్నారని చెప్పాడని పేర్కొన్నారు. ఈ సమాచారం అందుకున్న వెంటనే పోలీసులు తాజ్ హోటల్ వద్ద భారీగా మోహరించారు. బాంబు డిటెక్టర్లు, పోలీసు శునకాలు, బాంబు నిర్వీర్యం చేసే పరికరాలు పట్టుకుని తనిఖీలు నిర్వహించారు.
ట్రేస్ చేయగా..
అయితే.. ఫోన్ కాల్ను ట్రేస్ చేయగా.. మహారాష్ట్ర సతారా జిల్లాలోని కరాడ్ నుంచి వచ్చిందని అధికారులు గుర్తించారు. దర్యాప్తు చేయగా.. అది 9వ తరగతి చదివే ఓ విద్యార్థి చేసిన ప్రాంక్ కాల్ అని తేలిందని చెప్పారు. ఇప్పటివరకు అతనిపై ఎలాంటి కేసు నమోదు చేయలేదని పేర్కొన్నారు.
2008లో ఉగ్రవాదులు ఇదే హోటల్‌ను లక్ష్యంగా చేసుకొని మారణహోమం సృష్టించారు. 26/11 ఉగ్రదాడిగా పిలిచే ఈ ఘటనలో పలువురు విదేశీయులు సహా 166 మంది ప్రాణాలు కోల్పోయారు.
