సాగుచట్టాలకు వ్యతిరేకంగా దిల్లీలో మంగళవారం రైతులు తలపెట్టిన ట్రాక్టర్ ర్యాలీకి సర్వం సిద్ధమైంది. ఈ ర్యాలీలో 2లక్షలకుపైగా ట్రాక్టర్లతో రైతులు రంగంలోకి దిగుతుండగా.. ఇందుకు సంబంధించి ఇప్పటికే రోడ్ మ్యాప్ను సిద్ధమైంది.
ర్యాలీ నేపథ్యంలో అధికారులు కట్టుదిట్టమైన భద్రతా ఏర్పాట్లు చేయగా.. శాంతియుతంగానే ర్యాలీ చేపట్టాలని రైతు సంఘాల నేతలు పిలుపునిచ్చారు.
భద్రతా వలయంలో దిల్లీ..
గణతంత్ర దినోత్సవం రోజున దేశ రాజధానిలో సాధారణంగానే భారీ భద్రతా ఏర్పాట్లు ఉంటాయి. ఈ ఏడాది గణతంత్ర వేడుకలకు తోడు రైతులు ర్యాలీ చేపట్టడం వల్ల భద్రతను మరింత కట్టుదిట్టం చేశారు. ఫలితంగా రాజ్పథ్ ప్రాంతం భద్రతా వలయంలోకి జారుకుంది.
రైతుల ర్యాలీలో అలజడులు సృష్టించేందుకు పాకిస్థాన్ కుట్ర పన్నిందన్న నిఘా సంస్థల హెచ్చరికతో పోలీసులు మరింత అప్రమత్తమయ్యారు. ట్రాక్టర్ ర్యాలీ వేళ శాంతిభద్రతలకు ఎలాంటి విఘాతం కలగకుండా ఉండేందుకు.. వివిధ సరిహద్దు పాయింట్లలో వేలాది మంది భద్రతా సిబ్బందిని మోహరించారు.
రోడ్ మ్యాప్...
ర్యాలీ కోసం మూడు మార్గాలను ఎంపిక చేశారు. మొదటిది సింఘు సరిహద్దు నుంచి ఖర్ఖోడా టోల్ ప్లాజా వరకు 63కి.మీల మార్గం. రెండోది టిక్రి సరిహద్దు నుంచి అసోడా టోల్ ప్లాజా వరకు 62 కిలోమీటర్ల మార్గం. ఘజియాబాద్ నుంచి లాల్ ఖౌన్ వరకు సాగే 68కి.మీల మార్గం మూడోది.
గణతంత్ర వేడుకల అనంతరం.. ర్యాలీ ప్రారంభమవుతుంది. అయితే ఎక్కడ నుంచి మొదలైందో.. తిరిగి అక్కడికి చేరుకున్న తర్వాతే ట్రాక్టర్ ర్యాలీ ముగుస్తుంది.
రైతుల ఆదేశాలు...
ర్యాలీ నిర్వహించేందుకు.. ఇప్పటికే అనేక రోజులుగా దిల్లీ సరిహద్దుల్లో ఉంటున్న రైతు సంఘాల నేతలు ప్రణాళికలు రచించారు. ఈ క్రమంలో ర్యాలీ శాంతియుతంగా సాగాలని తోటి రైతులకు విజ్ఞప్తి చేశారు. ఎవరూ మద్యం తాగవద్దని, ఆయుధాలు తీసుకురావద్దని స్పష్టం చేశారు. 24గంటలకు సరిపడా రేషన్ తమ వద్ద పెట్టుకోవాలని సూచించారు.
ఇదీ చూడండి:- 'ట్రాక్టర్ ర్యాలీ తర్వాతే తదుపరి కార్యాచరణ'
